Myanmar-a inbeihna thleng mek karah China-in military exercise nei

Myanmar sipaite leh sipai sorkar dodaltu, armed group hrang hrangte inbeihna thleng mek karah, China chuan a sipaite chu border exercise a neihpui.

Myanmar armed group-te hian sipaite nen an inbeihnaa hma an sawn zel a, an ram hmar lama China nena an inkalpawhna, border crossing pawh sipaite kut aṭangin an la tawh niin an sawi. Armed group pathum intel khawm, 'Three Brotherhood Alliance' chuan China ramri bul khua eng emaw zat bakah Kyin-San-Kyawt border gate chu an la tawh a, hei bakah China ep, Muse khuaa insumdawnna hmunpui panga zinga pakhat pawh an kutah a awm tawh tih an sawi.

Myanmar nena an inrina bul hnaia Myanmar sipai leh armed group-te inbeihna a thlen mek laiin, China chuan Inrinni liam ta aṭang khan ramri hrulah hian military exercise a buatsaih. Ramri bul hnaia awm an mi leh sate chu hmun him lama insawn turin an ti bawk. China sipaite chuan combat training an neih hian eng chen nge a awh dawn leh, he hunah hian sipai eng zat nge tel erawh a tarlang lo.An tum ber chu sipaite theihna enchhin a, ramri ven leh thunun dan te, a ṭul huna eng kawng pawha chet chhuah theihna tura lo inbuatsaihte a ni tih an tarlang. Military exercise an neih tur hi a hmain Myanmar sipai sorkar chu an hriattir lawk niin sipai sorkar thupuangtu, Zaw Min Tun chuan a sawi bawk.