Israel-Hamas war : Inremna puan chhunzawm zel turin nawr
Israel leh Hamas-te'n ni li chhung atana indo chawlhsan lailawk tura inremna an siam chu a tawp hnuah ni hnih dang an pawtsei a, an hun pawhsei hi nimin khan a tawp leh ta. Hetih lai hian ram hrang hrang hruaitute chuan inremna hi puan chhunzawm turin an nawr mek.
Thawhlehni thleng khan Hamas chuan an mi hren zinga mi 81 an chhuah tawh a, heng mite hi hmeichhia leh naupangte an ni. Israel lam pawhin Palestinian mi, jail -a tang zinga mi 180 an chhuah tawh bawk.
Hamas chuan Israel nena an inkara palai hna thawktu, Qatar palaite hnenah ni li dang indo chawlh chhunzawm hi an remti tih an hrilh nia sawi a ni a, Israel lam hian hemi chungchangah hian sawi an la nei lo thung.
G7 ram - Canada, France, Germany, Italy, Japan, Britain leh US foreign minister-te chuan Hamas-te chu October 7-a Israel an beih ṭuma an mi mante chhuah vek turin an phut. G7 chuan indo chawlhsan chhunzawm zel tura an nawr bakah, Israel leh Palestinian-te chu inrem leh boruak ṭha tak hnuaia an awm duh thu leh, two-solution an thlawp thute an sawi.
US president Joe Biden chuan Hamas-te chuan Israel leh Palestinian-te inrem taka an awm an hlau a ni tiin, Gaza-a buaina neih zel chu Hamas ho duh dan a nih thu X-ah a sawi. A thusawi hian Hamas chungchangah a policy a danglam ta nia rinna te a awm a, mahse, a official chuan X-a a thil post avang hian Biden hian a policy a thlak danglam tihna a ni lo, a ti. Tun thla tir lam khan Biden hian Hamas nena inkahhai puan hi a thlawp loh thu leh, hei hi Isarel leh Hamas inkara inremna a siam phah dawn loh thu a lo sawi tawh a ni.
Hamas official-in Gaza tlawh turin Elon Musk sawm
US billionaire Elon Musk-a'n Israel tlawh a, Israel prime minister Benjamin Netanyahu leh president Isaac Herzog-te a hmuh hnuah, Hamas official chuan Gaza Strip tlawh ve turin a sawm.
Hamas senior official Osama Hamdan chuan Beirut-a press conference a neihah, Gaza-a indona thlengin thil a tihchhiat leh, mipuite tawrhnate a hmuna hmuhpui tura Elon Musk an sawm thu hi a sawi.
Hamdan chuan Israel leh Hamas-te indona thleng mekah, ni 50 chhungin Israel chuan Gaza-ah puakthei thei ton 40,000 chuang a thlak hman a ni tiin, US pawh Israel nena an inlaichinna chu ennawn tur leh, Israel tana ralthuam a pek ṭhinte pawh titawp tura an duh thu a sawi bawk.
Hri vangin thi an pun chhoh a hlauhawm : WHO
World Health Organisation (WHO) chuan Gaza Strip-a Israel-in beihpui a thlak mek karah, bomb puak avanga hri vanga thi an tam chhoh a hlauhthawnawm tih a sawi.
October 7 aṭanga Israel leh Hamas-te inbeihna a thlen hnuah, Israel chuan Gaza Strip kalpawhnate a khar vek a, hei vang hian fuel bakah ei tur leh in tur thlengin an tlachham hman a ni. Fuel tlakchham avangin Gaza Strip-a damdawi in leh UN facility hrang hrangte'n hna an thawk ṭha thei tawh lo a ni. WHO thupuangtu, Margaret Harrison chuan Gaza Strip health system chu siam ṭhat a nih thuai loh chuan, hri vangin mi tam tak an thi dawn tih a sawi a, bomb thlak avanga thi aiin an tam chho thei dawn niin a tarlang.
Indona thlen hnuah Gaza-ah hri a leng chho nasa hle a, mahse, vaccine, tui thianghlim leh ei tur thianghlimte a awm ṭha tawk lo a, damlo enkawlna tur damdawi thlenga an indaih tawk tawh loh avangin hri leng hi a hluar zel a hlauhawm hle nia sawi a ni.
Palestinian tang chhuah zinga pakhatin jail chhuahsan duh lo
Israel leh Hamas-te'n inremna an siam anga an mi tangte an inchhuah tawnnaah, Israel-in an ram tan ina Palestinian tang a chhuah zinga pakhat chuan jail a chhuahsan duh lo.
Jerusalem Post-in a tarlan danin, Palestinian tang chhuah zinga pakhat, Alaa Abu Sanima chuan chhuah tur zinga an telh chu a duh lo a, Palestinian Authority aṭangin hlawh leh ṭanpuina sum engmah a dawng dawn lo tiin, tan ina awm chhunzawm a duh zawk tih a sawi. Mahse Israel chuan a chhuah tho a ni. Israel-in tang a chhuah zinga a tam zawk hi Ofer prison leh Jerusalem Detention Center-a mite an nih thu Israel security agent, Shin Bet chuan a sawi.
Jewish American School-in Israel-ah volunteer tir dawn
US-a Chicago bula Jewish high school, Ida Crown Jewish Academy (ICJA) chuan an senior class zirlaite chu Israel-ah thla khat chhung volunteering mission turin a tir dawn tih a sawi.
ICJA Dean Rabbi Dr. Leonard Mataky chuan Israel-in hun harsa tak a tawh mekah, a ṭul ang anga pui turin zirlaite hi an kal dawn a, lo lama hnathawk thleng pawhin an pui dawn tih a sawi. "Kan zirlaite hian Yom Kippur War ( 1973 Arab-Israel war) laia school-in Israel a lo puih dante chuan an rilru a hneh hle a, hei vang hian tuna hun khirh tak an tawh mekah, an theih tawpa Israel tana chet chhuah ve an duh a ni,' a ti.