Israel-Hamas war : Gaza-a inremna ni khat atan pawtsei leh

Israel leh Hamas-te chuan Gaza Strip-a indona chawlh lailawk tura inremna an siam chu Ningani tlai khan ni khat dang atan an pawtsei leh.

Kar liam ta Zirtawpni khan an mi tangte inthleng tawnna turin ni li chhung atan indo chawlh lailawk hi an lo remti tawh a, an hun tiam a ral hnuah ni hnih an pawtsei leh a ni. An hun pawhsei hi Ningani khan a zo a, mahse, ni khat dang pawhsei an remti leh.

Indo chawlh lailawk chhung hian Israel leh Hamas-te'n an mi hren ṭhenkhatte an chhuah bakah, indona tuartu Gaza Strip-a civil mi chengte chhawmdawlna pawh a tam thei ang thawn luh a ni bawk.

Inremna an pawhsei hun a tawp hma deuh, Ningani khan Hamas chuan an mi hren mekte zinga mi an chhuah tur list hi Israel an pe leh a, Israel chuan ni khat dang indo chawlh chhunzawm hi remtiin, nimin zing aṭanga beihpui thlak chhunzawm a tum pawh a ṭhulh leh a ni.

US chuan Israel leh Hamas-te'n inremna an siam chu an pawtsei chhunzawm a, Hamas-te'n Israel an beih ṭuma an mi mante zawng zawng chhuah vek an nih theih a beisei thu a sawi. Israel tlawhtu, US secretary of state Antony Blinken chuan inremna chhunzawm a nih zel theihna tura hma an lak mek thu a sawi.

Inremna an siam hnuah, Hamas hian nimin thleng khan an mi man zinga mi 97 an chhuah tawh a, hengte hi hmeichhia leh naupangte an ni. Anni bakah ram dang sorkarte nena inremna an siam angin, Hamas hian an mi hren zinga Israel mi ni lo 27 an chhuah tawh bawk a ni. Israel lam hian Hamas-te'n Israel mi pakhat an chhuah manah Palestinian mi pathum zel an chhuah ve bawk.

Jerusalem-a inbeihna thlengah mi 3 thi

Israel leh Hamas-te'n indo chawlh lailawkna tur inremna an pawhsei leh hnu lawk, nimin zing khan Jerusalem khawpuia bus stop chu mi pahnihin beiin silaiin an pawng kah a, mi pathum an thi. Hliam paruk awm bawkin an zinga pathum chu an dinhmun a ṭha lo hle.

Police-te chuan pawikhawihtute hi East Jerusalem aṭanga kal niin, M16 leh handgun an ken thu an sawi. Jerusalem khaw luhna bul, Givat Shaul junction-a bus stop-a civil mi awmte chu an pawng kah a ni. Israel security force chuan pawikhawihtute hi kap letin an kap hlum ve nghal bawk. Civil mite beitu mi pahnihte hi Murad leh Ebrahim Nemer niin unau an ni a, Hamas movement zawmtute an ni.