US Secretary of State Henry Kissinger a thi

US secretary of state hlui, Cold War laia US foreign policy siamna kawnga mi pawimawh, Henry Kissinger chu kum 100 mi niin a thi.

Henry Kissinger hi Richard Nixon leh Gerald Ford-te president lai khan top diplomat leh national security adviser a ni ṭhin. An ram huna Nilaini zan khan Connecticut-a a chenna inah a thi a ni.

Germany-a piang, Kissinger hi Juda hnam a ni a, Nazi hlauin kum 1938 khan an chhungkuain US-ah an pem a, kum 1943 khan US citizen niin, US Army-ah kum thum a ṭang a, a hnuah Counter Intelligence Corps-ah a ṭang leh, Kum 1969-ah khatih laia US president Nixon chuan national security adviser atan a ruat a ni. National security adviser leh secretary of state a nih chhung, 1969 - 1977 chhung khan US chuan Vietnam War-a a inhnamhnawihna a titawp a, China nen inlaichinna siamin, Arab-Israel war, 1973 Yom Kippur War a tihtawptir bawk.

China ramah Kissinger hi a lar hle a, a thih thu pawh hi an social media platform-ah a darh nghal a, China News chuan 'China mipuite ṭhian' tiin a sunna pawh a ziak bawk. China Central Television chuan 'diplomat ropui', US-China inlaichinna siamna kawnga mi pawimawh a ni, a ti.