Myanmar Minister hlui kum 10 tang turin hrem

Myanmar-a Insein Prison chhunga court chuan an ram information minister hlui, Ye Htut chu rorel lai, sipai sorkar laka helah puhin kum 10 tang turin a hrem.

Radio Free Asia (RFA) chuan Nilaini khan closed-door trial neiin, Ye Htut hremna hi puan a nih thu a sawi a, thubuai ngaihtuah lai hian defence witness pawh tumah koh an ni lo tih a sawi bawk.

Army officer hlui, kum 64 mi Ye Htut hi president Thein Sein kaihhruai sorkarah khan information minister leh presidential spokesperson a ni. Thla hmasa khan social media-a thu dik lo thehdarhah puhin sipai sorkar chuan a man a ni. Thubuai siamsak a nih hnuin, Myanmar penal code section 505 (a) leh 124 (a) hnuaiah thubuai siamsak a ni a, heng thubuaiah hian thiam loh chantir ve vein, kum sarih leh kum thum tang turin hrem a ni ta a ni.