Israel-Hamas war : Inremna siam a tawp rualin indo chhunzawm leh nghal

Israel leh Hamas-te'n indo chawlh lailawk tura inremna an siam chu an ram huna nimin zing dar 7 khan a tawp a, inremna a tawp hnuah Israel chuan Gaza Strip-a Hamas hmunte chu an bei chhunzawm leh nghal. Hamas lam pawhin rocket hmangin Israel an kap ve leh nghal bawk.

Ni sarih indo an chawlh chhungin Hamas hian an mi hren zinga mi 110 an chhuah a, Israel lamin an ram chhung tan in hrang hranga Palestinian tang zinga mi 240 an chhuah bawk.

Nimina Israel sipaite'n beihpui an thlak hma hian Gaza chhim lama chengte chu hmun him lama insaseng tura hriattirna lehkhate an thlak a ni. Gaza Strip bul, Israel chhim lama Juda chenna, Yad Mordechai leh Netiv Hatara-ah pawh mipui fimkhur tura chahin siren tihrik a ni bawk.

Gaza-a health official-te chuan Israel sipaite beihpui thlak hian Rafah-a chenna in pahnih a fuh tel a, mi panga an thi niin an sawi. Hmun danga an beihpui thlakna nen, inremna a tawp hnua Israel sipaite airstrike-a thi hi mi 35 an tling niin health ministry chuan a tarlang.

Hamas armed wing, al-Qassam Brigades chuan inremna a tawp hnuah Israel chhim lama Ashkelon, Sderot leh Beersheba-te chu rocket hmangin an bei ve nghal tih an sawi. Gaza-a armed group dang, Palestinian Islamic Jihad pawhin inremna a tawp rualin Gaza Strip hnaia Israel khuate chu an bei ve nghal tih an sawi bawk a ni.

Israel Defence Force (IDF) chuan Gaza map siamin, zone tam takah a ṭhen a, hei hi Gaza-a cheng civil mite inbeihna thlenna hmun an pumpelh theihna tur a ni tih a sawi. Beihpui an thlak lehna turah, civil mite an lo inbuatsaih theihna tura an siam a ni tih sawiin, heng map hmang hian mipuite chuan an awmna aṭangin hmun him lam panna tur an hre dawn a ni, an ti.

Indo chhunzawm leh nghal mah se Qatar, Egypt leh US aiawhte chuan indo chawlhsan a nih leh theihna turin hma an la chhunzawm reng bawk. Nimin khan Israel leh Hamas aiawhte pawh an inbe leh mek.

Inremna bawhchhiaah Hamas puh

Israel chuan Gaza-a indona chawlh lailawkna tura inremna an siam bawhchhiaah Hamas a puh.

Israel Prime Minister Office chuan mi tangte chhuah tawn tura inremna an siamna hnuaiah, Hamas hian hmeichhia an man zawng zawngte chhuah an tiam chu an tipuitling lo tih an sawi. Hei bakah hian inremna siam chhung hian rocket hmangin Israel an kap tho niin a puh bawk.

PM Office chuan, 'Indo chhunzawm a nih leh tak avangin, Israel sorkar chuan a thil tum tihlawhtling turin a bei leh nghal dawn a ni. A tum ber chu Hamas-te nuai chimit a, Gaza chu Israel-a chengte tana hmun hlauhawm a nih tawh lohna tura siam a ni," a ti.

Kan mi hren mek la dam zat hriat a pawimawh ber lo : Hamas 

Hamas senior member Ghazi Hamad chuan inremna a tawp hma ni, Ningania CBS news-in a kawmnaah, Israel an beih ṭuma an mi man, nung dama la awm zat an zawh chu chhangin, la dam zat hriat chu a pawimawh ber lo, a ti.

Hamad chuan, 'Nung dama la awm zat ka hre lo, a zat hriat hi a pawimawh lo" tiin a chhang a, hei bakah Israel sorkar nawrna atan Hamas-te chuan nausen thla 10 mi, Kfir Bibas leh a u, kum li mi Ariel chu an ru tel niin a sawi bawk. Israel-in Palestinian ram a luahsak man chu Bibas chhungkua chuan a pek a ngai a ni, tiin a sawi zui.