Vladimir Putin-a'n fa 8 tal nei turin an ram hmeichhiate chah

Russia president Vladimir Putin chuan an ram hmeichhiate chu fa pariat tal nei a, chhungkaw hung tak siam chu tihdan phunga nei turin a chah.

Moscow-a World Russian People's Council conference-a thu a sawinaah President Putin chuan he thu hi a sawi a ni. 1990 chho aṭang khan Russia ramah hian nau piang zat hi a tlahniam chak hle a, nikum February thlaa Ukraine nena an indo aṭang khan indonaah hian mi nuai 3 dawn an thi tawh bawk. Hei vang hian Russia mipui tam zawka an pun chhoh chu an ngaihpawimawh chhoh tur a nih thu a sawi a ni.

Video kaltlanga thu a sawinaah hian Putin chuan,"Kan hnam zinga ṭhenkhat chuan kan tihdan phung ṭhin, chhung hung tak ni a, fapa pali panga leh a aia tam neih kha an la vawng nung a ni. Kan thlahtute tam takte khan fapa pariat leh a aia tamte an nei tih kan hriat reng a ngai a ni," a ti. Hei hi vawnnun leh a ngai a ni tih sawiin, chhungkaw hung tak nih chu Russia mipuite'n tihdan phung anga an neih leh a ngaih thu a sawi.

He conference hi Russia Orthodox Church hotu, Patriach Kririll huaihawt niin, ram chhunga pawl hrang hrang aiawhte an tel.