Philippines-ah Catholic mass nei lai bomb-in bei

Philippines chhim lam, Marawi city-a Mindanao state university gymnasium-a Catholic mass nei lai chu nimin zing khan bomb hmanga beih a ni a, bomb puakah hian mi pali thiin mi dang eng emaw an hliam.

Mita hmutu, bomb puahna gymnasium bul dorm-a awm pakhat chuan bomb puak chu transformer puak a an thu sawiin, bomb puah hnu lawkah university campus chhunga police leh ambulance hmuh tur an awm nghal thu a sawi. Police-te chuan bomb puak chu an chhui zui nghal a, pro-ISIL (ISIS) te thil tih a ni em tih pawh an chhui nghal tur thu an sawi bawk.

Mindanao-ah hian kum eng emaw zat chu tharum thawhna lam hawia inbeihna hi a lo thleng fo tawh a, 2017 khan Marawi pawh hi thla nga chhung ISIL beihpui thlakna hmun ni tawhin, mi 1,000-in nunna an chan a ni.

Philippine president, Ferdinand Marcos Jr. chuan bomb hmanga mipui beihna chu a dem thu sawiin, police leh sipaite chu mipui himna ngaihtuah hmasa zela tura a hriattir thu a sawi. "Pawn lam aṭanga firfiakte'n mawlmang leh rawng taka chet an la hi ka dem hle a,pawi sawi lote tawrhna tura tharum thawha che chhuak ṭhin firfiakte hi khawtlang hmelma an ni reng ang," tiin a tarlang. Mindanao-a Lanao del sur province governor, Mamintal Alonto Adiong Jr. pawhin pawikhawihna chu a dem thu sawi ve bawkin,"Ka province vil chhungah hian mihring dikna chanvo kan ngai pawimawh em em a, chu chuan sakhaw chungchanga mihringin dikna leh chanvo a neih pawh a huam tel a ni. Firfiakte'n zirna in an bei ṭhinte pawh hi kan do let a ngai, zirna inah hian remna chungchang kan inzirtir a, ṭhangtharte chu kan ram hma hun innghahna an nihnate kan zirtir ṭhin bawk si," a ti.

Mindanao state university thuneitute chuan an institution huam chhunga bomb tihpuah a ni chu pawi an tih thu sawiin,"Nunna chan tate chhung leh lainate kan tawrhpui tak zet a, he pawikhawihna avanga tuartute zawng zawng ṭanpui leh ngaihtuah chhunzawm hi kan ngaipawimawh ber dawn a ni," tiin thuchhuah an siam.