Israel-Hamas war : Israel security hotuin ram pawnah pawh Hamas-te umzui zel tiam

Israel security agency, Shin Bet hotu Ronen Bar chuan Hamas firfiakte chu Israel ram pawn lam, Lebanon, Turkey leh Qatar-ah pawh an um zui zel dawn tih sawiin, kum tam tak pawh ngai mah se an enliam mai dawn lo tih a sawi.

Shin Bet hotu thusawi hi Pathianni khan Israel public broadcaster Kan-ah tihchhuah a ni a, he thu a sawi hun tak erawh sawi chian a ni lo.

Ronen bar chuan,"Cabinet chuan tih tur min tuk a, Hamas ho nuai chimih a ni. Hei hi khawi hmunah pawh kan kalpui zel dawn. Hei hi kan Munich a ni. Gaza leh West Bank chauh ni lo, Lebanon, Turkey leh Qatar-ah pawh kalpui zel a ni ang. Kum pawh a duh rei mai thei, mahse, kan chhunzawm zel dawn a ni," a ti. Bar-a'n Munich a sawi chhuah hi kum 1972, September 5-a Munich Olympics neih laia Palestinian firfiak pawl, Black September member-te'n Israel infiammi pahnih that a, mi dang pakua an man chungchang a sawina a ni.

October 7-a Hamas firfiakte'n Israel chhim lam bei a, mi tam tak an thah leh an man hnuah, Israel chuan Hamas-te hi bei letin, nuai chimih vek a tum tih a sawi. Bar chuan Hamas nuai chimit vek tur chuan hun a duh rei dawn a, mahse, an ti ngei dawn tih a sawi. " Ram mipuite himna pek hi kan mawhphurhna a ni. Vanduaithlak takin October 7 khan kan ti thei ta lo. Mahse kan rawn tho chhuak mek a ni," a ti.

Hetih lai hian Israel Defence Force (IDF) chuan Hamas nena indo chawlh lailawk tura inremna an siam a zawh hnuah, Gaza Strip-ah beihpui an thlak chhunzawm leh nghal a, a bikin Gaza chhim lama Hamas hmunte an bitum a ni.

IDF thupuangtu Daniel Hagari chuan, "IDF te chuan chak takin Hamas chakna laite chu an bei chhunzawm leh mek. Kan policy chu a chiang, kan ram himna tiderthawng thei apiang chu na takin kan bei zel ang tih a ni," a ti. Israel sipaite hian beihpui an thlak chhunzawm leh hnuah hian Hamas tunnel, command centre leh ralthuam dahna eng emaw zat an kap chhe tawh niin an sawi bawk.

Nimin zing khan Israel sipaite chuan Gaza-a area 20 biala chengte chu hmun danga insawn chhuak tura hriattirna social media lamah an post leh. Sipaite hian chhim lam chu na zawkin an bei dawn tih an sawi. Hetih lai hian chhawmdawl hna thawktute chuan Gaza khawi hmun mah chu hmun him a awm tawh lo a, tlanchhiatna tur chuang a awm lo niin an sawi. United Nations children's agency thupuangtu, James Elder chuan minute 10 dan vela bomb puak ang a ni tih sawiin, Gaza chhim lama chengte chu hlauthawng reng renga an awm bakah anmahni pawh an chau zo tawh a ni, a ti. 'Bomb puah reng karah vawi thum vawi li insawn kual ngai chu, an fate ngaihtuah ngai bawk nen, an chau zo tawh a ni. Kalna tur dang an nei tawh chuang lo," tiin a sawi.