Israel-Hamas war : Medical supply chungchangah Israel leh WHO inhnial

United Nations health body, World Health Organisation (WHO) leh Israel chu Gaza Strip-a medical supply chungchangah online lamah an inhnial.

WHO hian Israel sipaite'n Gaza chhim lama an warehouse-a supply an dah khawlte chu dah bo vek turin an hriattir niin an sawi. WHO hotu Tedros Adhanom Ghebreyesus chuan hemi chungchang hi nimin khan X-ah a post a, "WHO chuan Israel sipiate hnen aṭangin kan medical warehouse-a supply kan dahte darkar 24 chhunga la chhuak vek tura hriattirna a dawng a, beihpui an thlak hnuah chuan hman theih a ni tawh dawn lo a ni," a ti. Israel hnenah he thupek hi sut leh tura ngenin, hospital leh medical infrastructure-te himna chu ngaihtuah turin a ngen.

Nimin khan Israel sipaite chuan WHO hotu thu post hi an chhang let nghal a, warehouse-a medical supply la chhuak tura hriattirna hi engmah an chhuah lo tih an sawi ve thung. Israel defence ministry body, COGAT chuan, 'Thu dik tak chu hei hi a ni, warehouse chhuahsan leh inla chhuak turin engtikah mah kan la ngen lo che u a, hei hi ziak ngeiin UN aiawhte hnenah pawh kan sawi chiang hle," an ti ve thung. UN official chu thu dik tak sawi tura an beisei thu an tarlang bawk.

UN special session-in Hamas-te chet dan dem

Israel kaihhruaia Thawh­ṭannia UN special session buatsaih chuan, Hamas-te'n October 7-a Israel an beih ṭuma inbeihna hmanrua pakhat atana pawngsualna an thlentir chungchanga khawvel a ngawi reng chu an dem thu an sawi.

UN-a Israel ambassador, Gila Edan chuan,"Israel chuan Holocaust hnuah inbeihna rawng leh rapthlak ber chu October 7 khan a tuar a, hemi ṭuma an chet dan hi ISIS ho ai pawhin a rawng a, ṭhenkhat chuan Nazi-te ai pawhin an rawng zawk niin an sawi," a ti. 'Chhungkua hal te an awm a, naupangte chu an nu leh pate mit hmuh lai ngeiin tihhlum an ni a, chutiang bawkin nu leh pate pawh an fa naupangte hmaa tihhlum an ni bawk. Hei chauh hi a la ni lo, Hamas-te chuan indona hmanrua atan hian pawngsual leh mipat hmeichhiat lam hawia pawikhawihna an hmang tel. Mahse vanduaithlak takin, khawvela pawl hrang hrang, hmeichhiate thlavang hauhtu turte erawh chu heng thil thleng chungchangah hian an ngawi reng thung," a ti.

US pawhin Hamas-te'n an mi man zingah hmeichhe ṭhenkhat an la hren tlat chhan chu, man an nih laia an chunga an chet dan rawng takte khawvel hriata sawi chhuah a nih lohna turin an ti a ni, tiin a lo sawi tawh bawk.

December 1 khan UN Women chuan thuchhuah siamin, Israel sipaite'n Gaza-a beihpui an thlak chhunzawm leh chu an dem thu leh, hmeichhia tu pawh, Israel leh Palestinian mi pawh, an zalenna leh himna an ngaihpawimawh thu an sawi. Hamas-te rawng taka an chetna chu an dem thu an sawi bawk a ni. Mahse Erdan chuan UN Women thuchhuah siam chu a hming maia siam, Israel mite chungchang an sawi vena pawh an rilru tak ni lo, an hmui chauh thleng a ni, a ti.

Israel-in special session a buatsaihah hian Democratic US senator Kirsten Gillibrand bakah, Facebook COO hlui leh women's rights and advancement group, Lean In dintu Shryl Sandberg te pawh an tel a ni. Gillibrand chuan October 7-a hmeichhia thah leh pawngsual tawkte tana au chhuah chu a ṭul thu a sawi a, women organisation lam an ngawi reng chu mak a ti thle tih a sawi bawk.