Britain-in visa dan khauh zawk siam dawn

Britain chuan ram dang mi pem luh tam zel venna kawng khat atan, visa dilte tan dan khauh zawk a siam.

Prime minister Rishi Sunak chu Britain-a ram dang mi, inhlawhfa tura lut pung chak lutuk venna tura ruahmanna siam tur hian nawr a ni a, hemi hnu hian visa dilna dan hi siam ṭhat a ni ta a ni.

Sorkar chuan visa dilna dan khauh zawka a siam hmang hian, kum khat chhunga pem lut awm hi nuai 3 vela an tihtlem theih an beisei. Kum 2022 khan Britain-ah hian ram dang aṭanga pem lut mi nuai 7.45 zet awmin, an pung chho zel a ni. Pem lutte hi EU ram aṭang ni loin, India, Nigeria leh China aṭangin an tam tawh zawk a ni.

Home secretary (interior minister) James Cleverly chuan an rama pem lut hi an pung chak hle tih sawiin, hma an lak a ngai ta a ni, a ti. Ruahmanna thar an siamah hian ram dang zirlai lutte chu an chhungte an hruai tel khap a ni a, hei hian postgraduate research degree tite erawh a huam lo ang. Hei bakah care worker-te pawh an enkawl tur an chhungte hruai phal a ni dawn lo a, England-a care firm-te chu visa an sponsor turah Care Quality Commission-ah in register vek a ngai bawk ang. Family visa dil tana mininum income phut zat pawh a leta tipungin, pound 38,700-ah tihsan a ni bawk.