Egypt thlawhtheihna Cyprus-ah hruaikawi

EgyptAir thlawh-theihna, Airbus 320 flight No. 181 chu nimin khan Alexandria aṭanga Cairo pana a hlawh laiin mi pakhatin a hijack a, Cyprus chhimlama Larnaka aiport-ah a ṭum luih tir.

Thlawhtheihna hijack-tu hian an ṭum hnuah passenger zinga a tam zawk chu a chhuah tir a, a thawktu mi pali leh ramdang mi pali te a hreng zui a ni. He thlawhtheihnaah hian passenger 56 leh thawktu 8 an chuang a ni.

Cyprus foreign ministry chuan thlawhtheihna hijack-tu hi Seif Eldin Mustafa a nih thu a sawi a, mahse a chanchin dang erawh a sawilang tel lo. Hemi hma hian Egypt state media-te chuan pawikhawihtu hi Alexandria University-a veterinary science professor, Ibrahim Abdel Tawwab Samaha niin a puang a, mahse hnuah a hijack-tu ni loin, passenger zinga mi a nih thu a sawi leh a ni.

Cyprus President Nicos Anastasiades chuan thlawhtheihna hijack hi firfiak pawl nen inzawmna an nei lo nia a lan thu a sawi. A hijack-tu hian nimin tlai lam thleng khan thuneitute hnenah pawh a thil phut chungchang engmah a la sawilang lo.