Egypt-in Morsi-a thlawptu judge 32 chawlhtir

Egypt Supreme Judicial Council chuan kum 2013-a sipaiten President Mohamed Morsi an paihthlak dawna dodaltu, judge 32 te chu an hna aṭangin a chawlh tir.

Morsi paihthlak a nih avanga lungawi lohna lantir a nawrh huaihawt zinga mi za tel chu court hian thiam loh a lo chantir tawh a, an zinga ṭhenkhat chu thi tura an chungthu relsak an nih bakah, hun rei tak tang tura hremte an ni.

Thawhṭanni khan judge 32-te hi an hna aṭanga chawlh luih tir an ni tih Supreme Judicial Council chuan puangin, hei hi politics-a an inrawlh avang leh, party ṭan lam bik an neihte an lantir vang a ni, a ti. Kar hmasa khan council hian judge 15-te chu a lo chawlh tir tawh bawk.

Hetihlai hian International Commission for Jurists (ICJ) chuan Egypt sorkar hnenah judge-te chungchanga a thutlukna siam chu sut turin a ngen. ICJ-a Middle East and North Africa director, Benarbia chuan, "Sorkar-in mimal taka judge-te a beih chhoh dan hi a hlauhthawnawm tawh hle a ni", a ti a, he thutlukna siam hi Egypt rama mihring dikna chanvo leh zalenna neihte nekchepna a nih thu a sawi.

Mahse council chuan judge an hrem takte chuan langsar takin Moris paihthlak a ni chu an duh loh thu an tilang a, thuchhuah pawh an siam hial a ni, a ti.