Myanmar-ah naupang hnathawk an tam

Occupation and Industry report tihchhuah tharah chuan Myanmar rama naupang kum 10-17 inkarah naupang panga zela pakhat chu school kal loin hnathawka chhawr an nih thu a tarlang.

Myanmar 2014 census peng pakhat hnuaiah Occupation and Industry report hi siam a ni a, Thawhṭanni khan he report hi tlangzarh a ni. Report-ah hian naupang kum 10-17 inkar zinga mi maktaduai 1.7-te chu hnathawka chhawr an nih thu tarlan a ni.

Myanmar tana United Nations Population Fund (UNFPA) palai, Janet E.Jackson chuan, "Kum 10-17 inkar naupang tam tak chuan hna ṭha zawk an hmuh theihna tura puitu tur zirna lam an zawm thei lo a ni" a ti.

Myanmar ram thingtlang hmun tam tak chu an dinhmun a la chhe hle a, United Nations-in a tarlan danin khuarel chhiatna leh tualchhung buaina thleng ṭhin vangin mi maktaduai khat chuang zet chu chhawmdawl ngaiin an awm niin a sawi.

2014 census tihchhuah hi kum 30 hnua census a tihchhuah leh hmasak ber a ni a, mahse chhiarpuiah hian Muslim Rohingya hnam telh an nih loh avangin sawisel a hlawh hle. Myanmar ramah hian Rohingya hi maktaduai 1.1 vel an awm a, state an nei lo a, an zinga a tam zawk hi khawthlang lama Rakhine state-ah an awm a ni.

Report-ah hian Myanmar ram mipui zinga a zahve aia tam, 52% chu agriculture, forestry leh fishing sector hnuaia thawk an ni tih a tarlang a, kum 65 chunglam zingah hmun ngaa ṭhena hmun khatte chuan kut hna an la thawk bawk. An ram pumah in pathuma pakhat zelin electric supply an dawng a ni.