Brazil sorkar fiah hmain minister a bang

Brazil President Dilma Rousseff-i kaihhruai sorkar paihthlak tuma eptuten an nawr mek laiin, Thawhṭanni khan Tourism Minister Henrique Eduardo Alves chu minister a nihna aṭangin a bang.

Eptute chuan President Rousseff-i hian an ram leiba pung zel thup tumin account te a khawih danglam niin an puh a, President a nihna aṭanga bang turin an phut a ni. Nimin khan Rousseff-i kaihruai ṭangrual sorkar siamtu zing a mi, Brazilian Democratic Movement Party (PMDB) chuan President hi an thawhpui chhunzawm zel dawn leh dawn loh an rel bawk.

President Rousseff-i hian a term hnihna atan thla 14 kalta khan a chelh ṭan a, mahse a party Workers' Party-a senior member eng emaw zat chu eirukna lama inhnamhnawiha puh an nih avangin a larna pawh a tlahniam sawt hle.

Kar hmasa khan President chuan eptuten an puhnate chu thu dik lo a nih thu leh, a thuneihna
aṭanga paihthlak an tumna hmanrua mai niin a sawi. Hetihlai hian a kaihhruai sorkara MP eng emaw zat chuan sorkar thlawpna hi hnuhdawh an duh tawh nia sawi a ni.

Brazil ram chhung hmun hrang hrangah eptu pawlte kaihhruain President bang tura phutin nawrh huaihawt a ni bawk.

Rouseff-i hian Congress-a fiahna paltlang tur chuan member 513 awmna lower house-a member hmun thuma ṭhena hmun khat thlawpna a neih a ngai dawn a ni. Hei vang hian MP 69 neitu PMDB thlawpna a hmuh a pawimawh dawn hle a ni. PMDB hruai-tu Michel Temer hi Rousseff-i deputy a ni a, President hi paihthlak a nih chuan Temer hi President a ni thei dawn a ni.

Rorellai Workers' Party hi kum 2003 aṭang-a Prseident atan Luiz Inacio Lula da Silva lakluh a nih aṭang khan Brazil-ah rorelna a la chelh chho reng a ni. Mahse tunhnaiah party member senior-te chu eiruknaa inhnamhnawih leh thamna laah puhin an hmingchhe hle a, an zinga eng emaw zat chu man leh chhui zui mek an ni.