US-ah vaccination drive lian ber kal pui ṭan

US Food and Drug Administration (FDA)-in Pfizer-BioNTech COVID-19 vaccine chu emer­gency atana hman phalna a pek hnuah leh,  Centers for Disease Control and Prevention-a Advisory Committee on Immunization Practices (ACIP)  in he vaccine hi kum 16 leh a chunglam te hnena pek a remtih hnuah, Pathianni aṭang khan US-an an ram chanchina vaccination drive lian ber chu kalpui ṭan a ni. 

Pathianni khan Michigan warehouse aṭangin truck-te chuan Pfizer-BioNTech COVID-19 an phur chhuak ṭan a, state hrang hranga hospital leh clinic 636-ah an pe dawn a ni. Vaccine semna beihpui thlakna hi Operation Warp Speed tih a ni. 

Michingan warehouse aṭanga vaccine phurchhuah hi vial 1,84,275 a ni a, nimin khan staet 50-ah vaccine vial box 189 hi sem kim vek hman an tum. Vaccine vial khatah hian dose nga zel a awm. 

Operation Warp Speed chief advisor Dr Monclef Slaoui chuan kumin chhungin state hrang hrangah vaccine dose maktaduai 14 sem chhuah hman an tum tih a sawi. "Nakkum January thlaah chuan dose maktaduai 50-80 kan sem hman ang a, February thlaah hemi zat bawk hi kan sem leh ang. Heng kan semchhuah hmasak  hmang hian kum upa zawk leh natna benvawn nei, first-line worker leh healthcare worker te chu vaccine hi kan pek theih kan beisei a ni," a ti. Slaoui chuan an ram mipui 75-80% vel chuan nakkum May leh June thla inkarah vaccine hi an dawn hman an beisei tih a sawi.

US President Donald Trump chuan FDA-in emergency atana Pfizer-BioNTech COVID-19 hman a phal hnuah, he vaccine hi amah leh White House staff-te chuan an dawng hmasa dawn lo tih a sawi. 

President leh amah hnaiha hnathawkte vaccine pek hmasakna turin ruahmanna hi siam ni mah se, President Trump chuan hei hi thlak tura a ngen thu Pathianni khan sawiin ṭul bik thilte a awm a nih loh chuan vaccine hi an dawng hma dawn bik lo tih a sawi a ni. 

John Hopkins University in a tarlan danin, US hi khawvela hri leng tuar nasa ber ram a la ni chhunzawm zel a, hri kai hmuhchhuah tawh hi 1,62,22,405  awmin, an zinga  3,01,278 in an thihpui tawh a ni. 

Canada prime minister Justin Trudeau chuan freezer-packed vaccine vial thawn thawh khatna chuan an ram a thleng tawh tih a sawi. Tun kar aṭangin heng vaccine te hi pek chhuah a ni ang. 

Canada sorkar hian Pfizer-BioNTech COVID-19 vaccine leina tura contract a lo siam tawh chu siamṭha lehin, tun thla chhungin dose 2,49,000 a dawng dawn a ni. Vaccine an dawn hmasak dose 30,000 chu ram chhung hmun 14-ah sem a ni dawn a, hri kai hlauhawm zual te, a bikin kum upa lam leh healthcare worker-te chu pek hmasak an ni dawn a ni.  

Bahrain chuan Pathianni khan China company, Sinopharm vaccine siam chu a pawm. Hemi hma hian Pfizer-BioNTech COVID-19 vaccine chu a lo pawm tawh bawk. 

Sinopharm vaccine siam enchhinna thawh thumnaah Bahrain pawh hi a tel a, enchhinna neih tura hian volunter 7,700 zet an inziak lut tih a sawi a ni. Sinopharm vaccine hi ram ṭhenkhat dang pawhin emergency atana hman turin an lo pawm tawh bawk a, tunah hian ram 10-ah clinical trial tawpna ber tur neih mek a ni.