Israel-Hamas war : US-in Israel tana ralthuam supply tihdanglam tum lo
Israel leh Hamas firfiak pawl indo mek karah, US chu Israel tana ralthuam a supply te ennawn tura nawrna a awm fo a, mahse, US chuan hei hi tihdanglam a tum lo nia sawi a ni.
US chuan Hamas nena an indonaah Israel a thlawp thu hi a lo sawi reng tawh a, hemi rual erawh chuan Gaza Strip-a beihpui an thlaknaah civil mite tawrhna thlen tlem thei ang ber tur ngaihtuah tura a duh thu a sawi fo bawk. Hamas-te'n Israel an beih avanga Israel-in a do letnaah, Israel chu a ram venghim turin dikna a nei a ni, a ti.
Israel leh US hi ram inṭhianṭha an ni a, US hian kum tinin Israel sipaite chhawmdawlna tur hi USD tld 3.8 hu a pe ṭhin. A thil pek zingah hian fighter jet bakah, Hamas ho leiverh siam tihchhiatsakna tur bomb chak tak pawh a tel. President Joe Biden kaihhruai sorkar chuan Israel sipaite chhawmdawlna pekna tur, USD tld 14 pawm belh turin Congress pawh a lo ngen tawh bawk.
Hetih lai hian US chu Israel sipaite a puihna titlem tura nawr tawk an awm a, mahse, US chuan ralthuam a supply ṭhin chu tihtawp emaw, tihdanglam emaw a tum lo. US official chuan Israel sipaite chhawmdawlna ralthuam an pek ṭhin chu tihtlem a nih chuan, a hlauhawm dawn a, Israel hmelmate an tiphur thei zawk dawn a ni, a ti.
Israel PM-in UN leh hmeichhe pawlte ngawi reng a dem
Israel prime minister Benjamin Netanyahu chuan nimin khan Hamas firfiakte'n Israel hmeichhiate an pawngsual leh an chunga rawng taka an chet chungchangah United Nations bakah international human rights organisation leh hmeichhe pawl hrang hrangte an ngawi tlat chu na takin a sawisel.
Prime Minister Netanyahu chuan a official X-ah post-in, "Women's rights organisation te, human rights organisation te: Israel hmeichhiate pawngsual an nih thu te, an chunga mipat hmeichhiat lam hawia rawng taka chetna thleng chungchangte pawh in hre vek- khawiah phiangsen nge in awm?" tiin a lungawi lohna thu a aupui. "Tunlai mi ram hruaitu, sorkar, ram zawng zawngte chu he chet dan rawng tak an demna thu sawi chhuak turin ka beisei a ni,"a ti.
Netanyahu hian Hamas-te'n an mi hren an chhuah takte bakah, an la hren mek chhungte pawh a lo hmu tawh bawk a ni. Hamas mi hren chhuahte hnen aṭang hian hren beh an nih laia an tawrhna nasa tak, lungchhiatthlak tak takte a ngaithla tih a sawi. Heng an tawrhnate hi Israel media-te pawhin an tarlang a, amah chauh ni loin khawvel pawhin an hria a, mahse, hemi chungchanga hmeichhe pawl leh human rights group-te ṭawng chhuak thawm engmah a hriat loh thu a sawi zui. "Juda hmeichhiate an nih avangin in ngawi zawk em ni?" tiin a zawt let hial.
Hamas-te chet dan hi kan vaiin kan dem a ngai : Biden
Israel hmeichhiate chunga Hamas chet dan rawng tak report a awm hnua khawvel ram leh pawl hrang hrangte an la ngawih laiin, US president Joe Biden chuan he thil thleng hi a dem takzet a, mi zawng zawngin Hamas-te chet dan chu an dem a ngai a ni, a ti.
President Biden hian Boston-a fundraising event a hmanpuinaah he thu hi sawiin, "Tun hnaiah Hamas mi hren chhuakte leh an pawikhawihna mita hmutute hnen aṭangin, an chet dan rawng leh rapthlak tak tak report a awm. Hmeichhiate pawngsual an nih bakah, an dam lai ngeiin an taksate hi hlepin, an ruangte pawh zah lo taka suasam zui a nih thu report-te kan hmu a ni. He thil hi a rapthlak tak zet a, khawvelin thil thleng hi a en liam mai tur a ni lo. Kan vaiin Hamas-te pawikhawihna thlen hi na taka kan dem a ngai," tiin a sawi.