NKorea hotuin an ram hmeichhiate fa tam zawk nei turin ngen

North Korea ram hotu, Kim Jong-un chuan an rama nau piang zat tlahniam zel chu ngaihven a ngai tawh tak zet tih sawiin, an ram hmeichhiate chu fa tam zawk nei turin a ngen. Hemi chungchang a sawina video tihchhuahah, Kim hi a mittuite a tla a ni.

An ram khawpui, Pyongyang-a nuho hun hman a hmanpuinaah Kim Jong-un chuan, nau piang zat tlahniam zel veng tur leh, naupangte ṭha taka enkawl hi chu nuho chuan an ngaihpawimawh a ngai tih sawiin, an ram chakna atana nuho an pawimawh thu leh, hemi kawnga an hnathawh avang tein lawmthu a hrilh bawk. "Party chhunga thil khirh tak tak leh, ram rorelna kawnga hun harsa ka tawh laite hian nute hi ka ngaihtuahnaah an rawn lang ziah zel a ni," a ti.

United Nations Population Fund chuan kum 2023-a North Korea rama nau piang zat, fertility rate a chhut danin nu pakhatin fa 1.8 zel nei ang an ni a, an ramah hian kum telin nau piang zat hi a tlahniam zel a ni.

North Korea ṭhenawm ram, South Korea leh Japan ramah pawh nau piang zat an tlahniam nasa tawh hle a, South Korea-ah hian nikum khan nu pakhatin fa 0.78 nei ang an nih laiin, Japan-ah chuan 1.26 a ni bawk.