Israel-Hamas war : UN hotuin Gaza-ah Article 99 a puang
United Nations secretary-general Antonio Guterres chuan thil thleng khat tak tiin, Gaza Strip-ah UN Charters Article 99 a puang. Hemi hmang hian UN Security Council chuan indona thleng mekah a ṭul angin hma an la ang.
Article 99 hi UN Charter-in secretary-general hnenah independent political tool a pek awmchhun, special power a ni. Secretary-General-in khawvel huapa boruak muanawm leh security lam tichhe thei nia a ngaih engpawh, council agenda-a awm kher lo chungchangah Security Council meeting a ko thei a, a thu thlen chungchangah Security Council hian hma an la zui dawn bawk a ni.
Council president hnena lehkha a thawnah, Guterres chuan Israel leh a ram luah, Palestinian territory-a thil thleng mek chuan khawvel huapa boruak muanawm leh himna tiderthawng theiah a punlun chho zel thei a ni tih sawiin, hei vang hian Article 99 hi a puang ta tih a hrilh.
Nilaini khan UNSC member 15-te chuan meeting an nei leh a, mahse, Israel leh Hamas leh an thurualpui inkara indona thleng mekah inkahhai puang tura nawrna, resolution erawh an siam leh thei lo a ni. Hemi hnu hian UN hotu hian Gaza-ah Article 99 hi a puang ta a ni.
Guterres hian October 18 aṭang khan inkahhai puang turin a lo nawr fo tawh a, Israel leh Palestinian territory-a mipuite tawrhna thleng chu a nasa tawh lutuk a ni, a ti.
Security Council hian Guterres thurawn anga hma a lak a, inkahhai puang tura nawrna resolution an siam chuan,an resolution a taka kalpui tura thuneihna dang a nei dawn a, hemi hmang hian hrekna siam leh, international force thawn luh chungchangah thu a nei dawn a ni. Mahse council-a permanent member panga - China, Russia, US, UK leh France-te hian an thu rel hnawlsakna turin veto power an nei vek thung. US hian October 18 khan a thuneihna hmang hian inkahhai puang tura resolution siam chu a lo veto tawh a ni.
UN-a Israel ambassador, Gilad Erdan chuan Guterres-a'n Article 99 a puang chu a lawm loh thu sawiin, hei hian Israel leh Hamas inkara buaina thleng mekah Guterres-a'n Israel a thliar hranzia a lantir chiang hle a ni, a ti. Erdan chuan,"Secretary-general in inkahhai puang tura a nawrna hi Gaza-a Hamas firfiakte rorelna tundin zel a nih theihna tura a tihna zawk a ni," tiin, Guterres chu bang turin a phut thu a sawi nawn leh bawk.