Nakkum March-ah Russia President thlang dawn

Russia Parliament upper house, Federation Council chuan an ram President thar thlanna hun atan nakkum March 17 a ruat.

Nimin khan Federational Council member-te hian vote thlakin, March 17 chu lungrual takin an pawm a ni. Chamber head, Valentina Matviyenko chuan inthlan hun tur chu House-in a pawm tak avangin, election campaign hun pawh hawn nghal a nih thu a sawi.

Nakkum inthlanah hian a ṭum khatna atan Russia-in Ukraine ram a luah, Donestk, Luhansk, Zaporizhia leh Kherson bialah pawh vote thlak a ni dawn tih Matviyenko chuan a sawi bawk.

President Vladimir Putin chuan inthlanah hian a chuh leh tur thu official-in a la puang lo a, mahse, a ni tur ruat fel a nih tak avangin a puan thuai rin a ni. Kum 2020-a an ram danpui a siam ṭhat hnuaiah, kum 71 mi Putin hian tuna a term hman mek a tawp hunah pawh President dinhmun hi term hnih a la chuh thei dawn a, nakkum inthlanah pawh chak chiang hle tura rin sa a ni.