Hri kai pun vangin SKorea school khar dawn

South Korea sorkar chuan an ramah hri kai an pun chhoh leh vangin vawiin aṭangin Seoul khawpui leh a chhehvel biala school-te chu khar turin a ti. 

Tun thla chhung chu capital region-a school-te chuan online mode-in an zir leh rih dawn a, hei bakah hian khawpui chhungah social distancing dan pawh hman chhoh a ni leh maithei nia sawi a ni. 

Prime minister Chung Sye-kyun chuan hri kai an pun leh tak avangin sorkar lam pawhin khuahkhirhna khauh zawka hmang tura nawrna a tawk tih a sawi. Mahse uluk taka ngaihtuah a ngai tih sawiin; minister, local government leh expert-te ngaihdan te lain, a ṭul a nih chuan social distancing dan hmanna turin restriction Phase 3 pawh puan a ni mai dawn tih a sawi. 

Korea Disease Control and Prevention Agency (KDCA) chuan nimin khan hri kai hmuh thar 718 an awm leh tih sawiin, heng zinga 682 chu tualchhung aṭanga kai an ni, a ti. Hri darh tur venna kawngah sorkar chuan sipai, police leh official-te hmangin hri kaite dapchhuah hna a thawk mek.