Israel Prime Minister-in Hezbollah a vau

Israel prime minister Benjamin Netanyahu chuan Lebanon-a firfiak pawl, Iran sorkar thlawp Hezbollah chu vauin, Israel an do a nih chuan Lebanon khawpui, Beirut chu Gaza leh Khan Yunis-ah an chantir ve mai dawn tih a sawi.

Prime Minister Netanyahu hian Ningania Israel Defense Forces' (IDF) Northern Command Headquarters a tlawh ṭumin he thu hi a sawi a ni. PM hi defence minister Yoav Galland leh IDF chief-of-staff Lieutenant General Herzi Halevi te'n an ṭawiawm.

October 7-a Hamas-te'n Israel an beih avangin, Israel-in Gaza Strip-a Hamas firfiakte lakah beihpui a thlak mek a, hetih lai hian Hezbollah hian Hamas-te an thlawp thu sawiin, Israel hmar lamah Israel hi an lo bei ve reng bawk a ni. Guided missile a kah chhuah hnuhnung berah, Israel mi pakhat a thi a ni.

"Hezbollah hi indonaah hian an tel ve a nih chuan, anmahni kut ngeiin Beirut leh Lebanon chu Gaza leh Khan Yunis-ah an chantir dawn tihna a ni," a ti. Khan Yunis hi Gaza Strip chhim lam khawpui, Hamas rorelna hnuaia awm a ni.

Hamas nena an indo mekah, Israel chuan hnehna chan ngei a tum a, hei hi sipaite puihnain an ti thei ngei dawn tih Prime Minister chuan a sawi.

Netanyahu hian October thla khan Hezbollah te vauna thu hi a lo sawi tawh a, Northern Command Headquarters-ah vek hian Hezbollah chuan Israel an do a nih chuan an la inchhir ang, tiin a sawi. "Hezbollah chu an rin phak baka nasain kan bei ang a, Hezebollah leh Lebanon ram tan chhiatna nasa tak a ni ang," a ti.

Gaza-a inbeihnaah Israel war cabinet minister fapa a thi

Gaza Strip-a Israel leh Hamas inbeihnaah Israel army hotu hlui, tuna war cabinet minister ni mek Gadi Eisenkot-a fapa, kum 25 mi, major Gal Eiselkot a thi.

Israel media chuan Maj. Eisenkot hi tunnel puakah hliam na tak a tuar a, damdawi ina hruai a nih hnuah a thi tih an tarlang. Prime minister Benjamin Netanyahu chuan Gal Esenkot chu pasalṭha dik tak a ni tih sawiin, a thihna chuan a rilru a tina hle tih a sawi. "Kan pasalṭhate thihna hi a thlawn dawn lo a, hnehna kan chan hma chu kan bei zel dawn," a ti.

Minister Gadi Eisenkot hi Israel Defense Forces' (IDF) Southern Command a tlawh laiin indonaa a fapain hliam na tak a tawrh thu hi hriattir a ni. Ningania Gaza chhim lama inbeihnaah hian Israel sipai dang pakhat, Sgt. Maj. Jonathan David Deitch pawh a thi bawk a ni.