Senate-in Ukraine leh Israel chhawmdawlna tur dansak

Republican chakna, US Senate chuan Ukraine leh Israel tana chhawmdawlna USD tld 110 pek belh tumna chu an dang. Hei bakah hian president Joe Biden chu US border policy thlak tura an phutna nawrna atan an ram security kaihhnawh thil danga fund pek tur pawh an dansak bawk.

Senate-a vote lakah hian wartime package pek belh tur hi a thlawp lamah vote 49 tlain, thlawp lo lamah vote 51 a tla thung.

Vote lak hnua White House-a thu a sawiah, President Biden chuan chhawmdawlna pek tur chungchanga vote laknaah, border policy hmanruaa hmangte chu an ram security infiamna atana hmangah a puh a, hemi rual hian policy ṭhenkhat siam ṭhat leh thlak danglam a ṭul pawhin a inhawng reng tih a sawi.

"Congress-a Republican-te chuan Putin chu a beisei phak bak thilpek ṭha ber pek an duh a ni," tiin, Russia nena indo mek, Ukraine chhawmdawlna pek chhunzawm an nih loh chuan Putin-a ṭan hmun an tihchaksak dawn a ni, a ti.

President Biden hian Congress-ah hian indona hmachhawn mek, Ukraine leh Israel bakah, security dang tana fund tam tham tak hi a dil belh a ni. Hetih lai hian US hian Ukraine puihna atan hian USD tld 111 zet a pek tawh avangin, chhawmdawlna pek chhunzawm zel hi an dodal a ni.