Kum hnih hnuah Turkey-in Israel-ah ambassador dah dawn
Turkey chuan kum hnih chhung Israel rama ambassador a dah loh hnuah, Pathianni khan Israel-a ambassador tur a ruat thar leh.
Kum 2018-a US President Donald Trump-a'n Israel khawpui atana Jerusalem a pawm a, Tel Aviv ṭanga Jerusalem-a US embassy sawn duh lohna lantira Gaza Strip-a nawrh huaihawt, Palestinian-te beih let an nih avanga lungawi loin Turkey hian hemi kum May thla khan Israel rama a ambassador dah chu a ko haw a, an rama Israel ambassador awm pawh chu a hnawtchhuak nghal bawk.
Hemi chhan letna atan hian Israel chuan Jerusalem-a Turkey consul-general chu a hnawtchhuak zui ve nghal a ni.
Kum hnih chhung ambassador hi dah chhunzawm loa a awm hnuah, kum 40 mi, Ufuk Ulutas chu Israel-a ambassador thar atan a ruat ta nia sawi a ni. Ulutas hi mi fing fel tak, Palestinian thlawptu nia sawi a ni a, Jerusalem-a Hebrew University-ah Hebrew leh Middle Eastern politics pawh a lo zir chhuak tawh a ni.
US President kalchhuak tur, Donald Trump hmalaknain tun hnaiah Israel hian Arab ram - Bahrain, Morocco, Sudan leh United Arab Emirates-te nen inzawmna siamna tur inremna an lo ziak tawh bawk.
Kum 2010 khan Israel commando-ten Turkish lawnga chuang, Palestinian-te hnena chhawmdawlna pek tum, Turkish activist 10-te an thah avangin Turkey chuan Israel nena an inzawmna hi a lo titawp tawh a ni. Kum 2016 khan inzawmna hi an siam ṭha leh a, mahse kum 2018-a Israel-a US embassy sawn chungchangah an inkar boruak a chhe chho leh a ni.
Turkey president Recep Tayyip Erdogan leh Israel prime minister Benjamin Netanyahu-te hi ṭawngkam na tak takin an inbei fo a, 'firfiak' leh 'tualthattu' ti te pawhin an lo inpuh tawh a ni.
Erdogan chuan Israel law-in Juda-te ram tia Israel a tarlang pawh chu na takin a lo sawisel a, kumin kumtir lama Trump-a'n Middle East-a remna leh muanna a awm theihna tura ruahmana a siamte chu sawiselin, Israel duhsakna lantir nasa lutukah a puh.