Egypt President thar tur thlang

Egypt mipuiten nimin aṭang khan an ram President thar tur thlangin vote an thlak a, president ṭanglai Abdel Fattah el-Sisi chu a term thumna atan a tlin leh ngei rin a ni.

Vote thlak hun hi Thawhlehni thleng hawn a ni dawn a, hemi chhung hian nitin an ram huna zing dar 9 aṭanga zan dar 9 thleng vote thlak theih a ni ang. Official result hi December 18-ah an puang dawn a ni. Vote nei mi mtd 67 an awm.

Egypt economy dinhmun hi a ṭha lo hle a, kumin March thlaa an ram pawisa, Egyptian pound hlutna a zahve zeta a tlakhniam vangin an rama thil man sanna hi 40% vel a tling tawh. Hemi hma pawh hian an ram mipui hmun thuma ṭhena hmun hnih, mi maktaduai 196 vel chu mi rethei, below poverty line an ni.

President thar thlannaah hian President El-Sisi bakah candidate dang pathum - left-leaning Egyptian Social Democratic Party hruaitu Farid Zarhan, Waft aṭangin Abdel-Sanad Yamama leh Republic People's Party aṭagnin Hazem Omar-te an awm.

Field marshal hlui, El-Sisi hi kum 2013-a an rama democracy hmanga President atana thlan tlin hmasa ber, Mohamed Moris paihthlak a nih hnuah President a ni a, kum 2014 leh 2018-a inthlan an neihah hneh taka thlan tlin leh niin, vote hi 96% chuang a hmu a ni. El-Sisi hian an ram president term, kum li ni ṭhin chu kum rukah a pawtsei a, President term chelh thei zat pawh a zawna term hnih ni ṭhin chu term thumah a pawtsei bawk a ni.