Myanmar ram hmun tam zawkah inbeihna thleng

United Nations chuan October thla tawp lamaṭanga Myanmar-a rorellai, sipaite leh armed group hrang hrangte inbeihna thleng chuan zual lam a pan zel a, he inbeihna hian Myanmar ram hmun thuma ṭhena hmun hnih vel a tuam tawh niin a tarlang.

Sipaiten civil sorkar an paihthlak hnua demcoracy sorkar aiawhtu atana din, National Unity Government (NUG) thlawptu, chi bil armed group hrang hrang bakah People's Defence Force (PDF) leh sipaite hi October thla aṭangin ramri bial hrang hrangah an inbei leh nasa hle a ni.

UN Office for Coordination of Humanitarian Affairs (OCHA) chuan October 26 aṭang khan inbeihna thleng vangin mi nuai 5.78 chuan an in leh lo an tlanchhiatsan tawh a, kar ruk chhungin inbeihna avangin civil mi 363 thiin, mi 461 in hliam an tuar bawk a ni, a ti. "Inbeihna a thlen chhunzawm zel avang leh, kawngpui dan chhoh a nih avangin civil mite dinhmun a derthawng sawt hle a, hmun him lama tlanchhe turte tan pawh a khirh tawh hle a ni," tiin a sawi. Hei bakah hian inbeihna thlenna bialahte inbiakpawhna tihtawp a nih avangin thil thlen dan kimchang pawh hriat a harsat thu a tarlang bawk.

Kum 2021 February thlaa sipaiten civil sorkar thuneihna an hnehchhuh hnuah, Myanmar ramah hian sipai sorkar duh lote leh sipaite inkarah buaina a chhuak zui reng a, mi maktaduai hnih chuang chu himna zawngin hmun dangah an tlanchhe tawh a ni. Hetih lai hian tualchhungah buaina a thlen chhunzawm reng avangin mipuite harsatna an tawk nasa a, chhawmdawl ngai an awm belh zel bawk.

2023 Humanitarian Response Plan for Myanmar chuan ram chhunga buaina tuar nasa zual, mi maktaduai 4.5 te chhawmdawlna tura USD mtd 887 an mamawh thu an lo sawi tawh a, hetih lai hian an sum mamawh aṭang hian 29% vel chauh an la dawng tih an sawi. Kar liam ta khan UN Central Emergency Response Fund (CERF) chuan tun hnaia inbeihna thleng tuartu mipuite chhawmdawlna tur hian emergency fund, USD mtd 7 pekna tur a pawm.