Myanmar President thar Htin Kyaw la lut Foreign Affairs minister-ah Suu Kyi dah

Myanmar ram President thar atan Htin Kyaw (69) chu nimin khan rin-awmna thu tiam tira lakluh a ni ta. A rual hian vice president atan Henry Van Thio leh Myint Swe-te leh cabinet minister turte pawh lakluh nghal an ni.

Htin Kyaw hi kum 50 chuang zet hnua Myanmar rama civil mi President atana thlanchhuah hmasa ber a ni. President kalchhuak, Thein Sein-a a thlak a ni. Thein Sein-a hruaina hnuaiah hian Myanmar ram dinhmun nasa takin inthlak danglam a, tunhma lama ram dang laka inkharkhip tlat ṭhin kha a inhawng tawh a, foreign investment lam thlengin an hip lut ṭan tawh a ni.

President thar lakluh ruala a cabinet minister lakluh zinga a tam zawk hi Presi-dent party, National League for Democracy (NLD) member-te an ni. NLD hotu lu ber, Aung San Suu Kyi-i chu foreign affairs minister atan lakluh ani a, hei bakah hian president's office, education, energy leh electric power a chang tel bawk ang. Sipai lamin ministry pawimawh pathum - defence, home affairs leh border affairs-te an chang thung.

President atana lakluh a nih hnua thu a sawiah, Htin Kyaw chuan an rama inpumkhatna ṭha siam a pawimawh thu a sawi. "Sorkar thar chu impumkhatna te, remna leh muanna a awm theihna turin a thawk dawn a, democracy ram dik tak a din theihna turin ram danpui siamṭhat a tum dawn a, mipuite nunphung chawikang turin theihtawp chhuah a ni ang" a ti.

President thar Htin Kyaw hi kum 1946-a piang a ni a, a pa chu thuziak leh hlaphuah thiam tak, Min Thu Wan a ni a, a pa hian kum 1990 inthlanpui neihah khan NLD hmingin a lo chuh tawh a ni. Htin Kyaw-a nupui hi NLD dintu zinga mi, U Lwin-a fanu, MP ni lai Su Su Lwin a ni. President atana thlan anih dawn thlengin Htin Kyaw hian Suu Kyi-i nu hming chawia din, Daw Khin Kyi Foundation hotu hna a chelh a ni.

Myanmar President kalchhuak ta, Thein Sein chuan a term tawp hma Thawhlehni khan, an awmna khaw-thlang lam, Rakhine state-a kum li dawn zanlam curfew puan tawh chu a hlip. Rakhine state-ah hian Rohingya Muslim leh Buddist-te an intibuai fo a, buaina chhuak vangin mi 200 chuang zetin an thihphah tawh a, mi nuai chuang chu in leh lo nei loin an awm phah bawk.

Thein Sein hian Rakhine state sorkar report aṭang leh, state chhung dinhmunte enfiahna aṭangin mipuite nunna atana hlauhthawnawmte a awm tawh lo nia sawiin, a term tawp dawnah curfew hlihna thupek a tichhuak a ni. Report hian kum hnih kalta chhungin Rohingya leh Buddhist-te inkarah buaina lian tham a chhuak lo niin a tarlang.

Rakhine state-ah hian Rohingya Muslim mi maktaduai 1.1 vel an awm a, enhran an hlawh bakah an zingah a tam zawk chu an rethei hle a ni. Myanmar sorkar chuan Rohingya Muslim-te hi citizen-ah a pawm lo a, Bangladesh
aṭanga pem lut angin a chhiar a ni.