PMDB-in Brazil sorkar thlawpna a hnukdawk

Brazil rama ṭangrual sorkar siamtu party zinga lian ber, Brazilian Democratic Movement Party (PMDB) chuan President Dilma Rousseff-i kaihhruai sorkar a thlawpna a hnukdawk.

PMDB hian Thawh-lehni khan meeting neiin, ṭangrual sorkar aṭanga inhnuhdawh hi an rel a, an party aṭanga cabinet minister paruk awm leh sorkar-a hna pawimawh chelh dangte pawh banna thehlut turin an ti nghal a ni.

Hetihlai hian eptu party-te chuan President Rousseff-i leh rorellai party Workers Party lakah lungawi lohna lantirin, President chu bang turin an nawr chhunzawm reng a ni. Rousseff-i paihthlakna tur hi Parliament-ah chhawpchhuah a ni dawn a, fiahna hi a paltlang zo lo a nih chuan PMDB hruaitu, vice president nilai Michel Temer chu pre-sident a ni thei dawn a ni.

Parliament-a Presi-dent paihthlakna chhawpchhuah hian hun a duh rei dawn a, Lower House leh Senate-in an pawm ve ve a ngai dawn a ni. A hma berah July thla tawp lam emaw, August thla tir lamah emaw tihfel theih chauh rin a ni bawk.

President Rousseff-i hian amah paithlakna tur kalpuina hi pumpelh tur chuan Chamber of Deputies-ah thlawptu member 172 tal a neih a ngai dawn a ni. Mahse PMDB in sorkar thlawpna a hnuhdawh tak avangin ṭangrual sorkar hian member 123 chauh a nei pha rih a, party tenau dang thawhpui tur a zawn a ngai dawn a ni.