EgyptAir thlawhtheihna hijack-tu an man

EgyptAir thlawtheihna hruaikawi a, Cyprus-a Larna-ka airport-a ṭum luih tirtu chu Thawhlehni zan khan man a ni a, a mi hrente pawh him taka chhuah an ni.

Thlawhtheihna hruai-kawitu hi Seif Eldin Mustafa a ni a, Thawhlehni khan Alexandria aṭanga Cairo pana thlawk chu hruaikawiin Cyprus ramah a ṭum luihtir a ni. Larnaka airport-a an ṭum hnuin Mustafa hian thlawhtheihnaa chuang zinga a tam zawk chu a chhuahtir a, khualzin pathum leh a thawktu mi pali a hreng a ni. Mahse security force-ten thlawhtheihna hi an hual hnuah Mustafa hi a inpe a, a mi hrengte pawh him takin an chhuak a ni.

Mustafa hian thihchilh bomb nia a sawi a hren chu man a nih hnu hian bomb tak niloin a lem a nih thu Cyprus police-te chuan an sawi.

Cyprus Foreign Affairs Minister Ioannis Kasoulides chuan thlawhtheihna hruai-kawitu hian harsatna siam loin security force-te kutah a inpe a, a rilru lamah harsatna nei nia a lan thu a sawi.