Japan security law duh loin kawng zawh

Japan sorkarin security law a siam thar duh lohna lantirin Tokyo khawpuiah mi tam takin kawng an zawh.

Thawhlehni khan Japan National Diet building bulaah mi 37,000 vel pungkhawmin, security law siam thar chu sut leh nghal turin sorkar an phut. Mipui pungkhawmte chuan poster kengin, 'Indona a zo tawh' 'Security law hi sut leh nghal rawh u' tih te leh, Prime Minister Shinzo Abe bang tura an phutna thu ziakte an keng bawk.

Security law thar hi Prime Minister Shinzo Abe-an a duan niin, security lama Japan leh US thawhdunna zau zawka kalpuina tur a ni. He dan thar hnuaiah hian Japan chuan kum 70 hnua a vawi khatna turin an ram beitu ni kher lo, tualchhung indona thlenna ramah a sipai, Self-Defense Forces (SDF) a thawn thei tawh dawn a ni.

Hetihlai hian Japan Su-preme Law chuan SDD hi Japan ram pawn lamah indo tura an chhuah a khap thung a ni.

Kawngzawh huaihawt-naah hian Japan rama eptu party din thar, Democratic Party hruaitute pawh an tel a, party secretary general Yukio Edano chuan, PM Abe-a kaihhruai sorkar chuan an ram danpui pawh dah pawimawh loin a hlutna pawh a hloh tir tawh a ni, a ti.

Mipui pungkhawmte chuan PM chuan eptute lam ngaihdan a ngaihthlak sak duh lo nia sawiin, democracy kalphung a rapbet a ni, an ti. Securty law sut leh tura eptute ngenna pawh Diet-ah sawiho a ni lo tih an tarlang bawk.

Security law thar hi hman nghal ni mah se, mipui lam sawiselna a nasat avangin Japan sorkar chuan ramdanga a sipaite tirh chhuah hun tur erawh ala tih khawtlai a ni.