Nigeria school naupang 300 chuang chin hriat lohin awm

Nigeria hmarthlang lam, Katsina state-a Kankar khuaa secondary school chu kar liam ta Zirtawpnia silai kengten an beih hnuah, school naupang  300 chuang chu tun thlengin an chin hriat lohin an la awm. 

Zirtawpni zan khan mipa school, Government Science School hi motor­cycle-a chuang, silai kengten luhkhungin an bei a ni. Security force-te pawh kal nghalin, school beitute nen hian an inkap zui a, zirlai tam tak chu an school bul ramhnuaiah an tlanchhia a ni. 

Katsina governor Aminu Masari chuan Pathanni zan khan security official-te meeting neihpuii, boarding school-ah hian zirlai 839 an awm thu leh, an zinga zirlai 333 chu an awmna chin an la hriat theih loh thu a sawi. 

Masarwi chuan zirlai tam zawk chu inbeihna thleng vanga ramhnuai lama an tlanchhiat hnuah an rawn kir leh tawh tih a sawi a, mahse mi 300 chuangte chu an awmna an la hre lo a, an la biru zel nge rukbo an ni tih an hre thei rih lo tih a sawi a ni. 

Defence minister major general Bashir Salihi-Magash pawhin Katsina Governor hi hmuin, sipaite chuan zirlai naupang chin hriat loha awmte chu zawnchhuah leh chhan­chhuah ngei tumin theihtawp an chhuah dawn tih a hrilh. School beitute pawh man chhuah ngei an ni dawn tih a sawi bawk. 

Eng pawl mahin school beitute an nih thu hi an la sawi lo. Inbeihna thlenna hmun hi Islamic law khauh taka kenkawh duha ram chhung hmarchhak biala chetla ṭhin, Boko Haram helpawlte chetna ṭhin aṭanga a hlat avangin an inhnamhnawih lo nia rin a ni. Pawikhawihtute hriat chian an nih loh avang leh, an thil tum ber hriat a nih loh avangin Katsina state chhunga school chu khar tir vek an ni nghal a ni. 

Kum 2018 khan Boko Haram pawl hian Dapchi khuaa zirlai hmeichhia 100 chuang an lo ru bo tawh a, kum 2014 khan Chibok khua aṭangin zirlai hmeichhia 270 chuang an ru bo tawh bawk a ni.