Israel-Hamas war : Israel PM-in Hamas firfiakte inpe turin a ti
Israel prime minister Benjamin Netanyahu chuan Hamas firfiakte chu an ralthuam daha inpe turin a ti a, Hamas-ho tawp hun a hnai tawh niin a sawi.
Prime Minister Netanyahu chuan Gaza Strip-a Hamas pawl mi leh sa eng emaw zat chu Israel kutah an inpe tawh nia sawiin, "Indona chu la chhunzawm zel ni mah se, Hamas tawpna tur a inṭan chho tawh a ni," a ti. Hamas-ho chu an hotu, Yahya Sinwar tana an nunna hlan lo turin a chah bawk. "Hamas firfiakte ka hrilh duh chu : A tawp tawh. Sinwar tan in nunna hlan ringawt suh u, tunah rawn inpe zawk rawh u"
Israel sipaite hian Gaza Strip-a Hamas-ho hmun hrang hrangte an la bei chhunzawm zel a, hetih lai hian ram hrang hrangte chuan inkahhai puang turin an nawr reng bawk. Inkahhai puang tura nawrtu zingah hian Russia leh UN secretary-general Antonio Guterres pawh a tel.
Netanyahu chuan Pathianni khan Russia president Vladimir Putin nen telephone-in an inbia a, minute 50 dawn an inkawmnaah, Israel Defence Force (IDF)-te'n Gaza-a beihpui an thlak chhunzawm a ṭulna chhante a hrilh fiah nghal a ni.
Indo chen tur chu Israel kutah a awm : Antony Blinken
US secretary of state Antony Blinken chuan indo chen tur chu Israel kutah a awm a ni tiin, he indona hi a tawp thuai chu mi zawng zawngin an duh a ni, a ti.
Hemi rual hian Israel dinhmun anga ding ve ni ta se, firfiakte'n rawng leh rapthlak takin an ram bei ve ta, eng ram pawhin an tih ang hian a ti ve ngei ang, a ti. Mahse heti chung hian Israel chuan firfiakte bei let a, Hamas nuai chimih a tumnaah civil mite thihna thlen tlem thei ang ber tura a kalpui a ṭul thu leh, Gaza Strip-a harsatna tawk mek mipuite chhawmdawlna luhtir ṭha turin a ngen nghal bawk a ni.
Hamas-te'n an mi hrente thahah vau
Hamas firfiakte chuan Pathianni khan Israel vau let ve bawkin, Gaza Strip tana chhawmdawlna thawn luh belh a nih loh chuan, an mi hren mekte chuan nung damin Gaza Strip an chhuahsan dawn lo tih an sawi.
Hamas armed wing thupuangtu, Abu Obeida chuan hemi chungchang hi Pathianni khan TV-ah sawi langin, an thil phut zingah tang inthlengte pawh a tel bawk. Israel leh Hamas-te'n tang inthleng tura indo chawlh lailawk, ni sarih an neih chhung khan Hamas hian an mi hren mek zinga 110 chhuahin, Israel hian an ram tan in hrang hranga Palestinian tang zinga mi 240-te a chhuah bawk. Hamas-te hian October 7-a Israel an beih khan mi sang chuang an thah bakah, mi 240 chuang an man a, a tam zawk hi Israel mi niin, ram dang mi eng emaw zat an tel bawk.
Inremna an siam theihna atana hma latu ber, Qatar palaite chuan inremna siam a nih leh theihna turin hma an la a, tunah rih chuan inremna siam hi beiseiawm rih lo mah se, an nawr chhunzawm zel dawn tih an sawi.
UN General Assembly special meeting nei dawn
Indona avanga Gaza Strip-a chengte'n harsatna an tawh mek chungchang ngaihtuahin, vawiin hian United Nations General Assembly special meeting neih a ni dawn.
Israel-Hamas indona thlen hnuah, Gaza Strip chungchang ngaihtuah hian UN hi an ṭhu khawm fo a,mahse, resolution an la tichhuak thei lo. Kar liam taa UN Security Council meeting-a inkahhai puang tura phutna resolution siam chu US-in a veto a ni.
Egypt leh Mauritania aiawhte ngenna avangin vawiina special meeting hi koh a ni a, inkahhai puan chungchangah vote an lak leh rin a ni.