Argentina President thar la lut

Argentina President thar atan Javier Milei chu Pathianni khan rinawmna thu tiamtira lak luh a ni.

Kum 53 mi, TV pundit hlui, libertarian economist Milei hian President atana lak luh a nih hnua a thu sawiah, an ram economy dinhmun chhe tawh lutuk chu rei lote chhunga siam ṭhat mai theih a ni dawn lo a, pawisa pawh a awm rih lo tih a sawi. Sorkar kalchhuak tain dinhmun ṭha lo tak a hnutchhiah a, an ram sum leh pai dinhmun chhe zel tur veng tura theihtawp an chhuah tur thu a sawi. Economic plan a siamah pawh sorkar sum hman chhuahna nasa taka tihhniamte a tel a, a ruahmanna siamte hi kimchang zawkin a la tichhuak dawn a ni.

President thar lak luh inkawm hi Ukraine president Volodymyr Zelenskyy, Hungary prime minister Viktor Orban leh US palaite'n an telpui a, Brazil president hlui Jair Bolsonaro leh Uruguay conservative leader Luis Laclle Pou te pawh an tel bawk.