Israel-Hamas war : Israel-in Gaza luah hlen tumna a nei lo : Defence Minister

Israel defence minister Yaov Gallant chuan Gaza Strip-a Hamas firfiak pawl laka beihpui an thlak mek karah, Israel chuan Gaza Strip luah hlen tumna a nei lo tih a sawi. Gaza Strip-a rorel lai, Hamas firfiakte hneh an nih hnuah, Israel chuan he bial hi Israel dodaltu ni lo, eng pawl kutah nge dah a nih ang tih chungchang sawiho turin a inhawng reng a ni, a ti.

Defence Minister Gallant chuan, "Israel chuan Hamas-te hneh leh nuai chimit turin hma a la zel dawn a, mahse, a hnu lam zelah Gaza Strip-ah hian awm hlen a tum hran lo. Kan security leh, Gaza ramri hrulah kan mi leh sa awmte himna tur chu kan ngai pawimawh a ni," tiin a sawi.

Minister chuan Lebanon-a Iran thlawp firfiak pawl, Hezbollah chu ramria safe zone siam a, mipuite himna tur intiamkam tura inremna siampui turin an inhawng tih a sawi bawk. "Gaza-a thil thlen dan an hmuh aṭangin, inbeihna a thleng a nih chuan na takin kan chhang leh thei dawn a, hei hi Hezbollah lam pawhin an ngaihtuah ngei ka beisei," a ti.

Galland chuan Hamas hotu, Yahya Sinwar chu biain inpe tura a hrilh thu a sawi. Jabalya leh Shejaia-ah Hamas-te chu hneh an ni tawh a, 'Hamas-te chuan hneh theih loh niin an inngai a, mahse, tunah chuan an tlusawp mek a ni," tiin a sawi. October 7-a Israel beih ṭuma inhnamhnawih, Hamas firfiak eng emaw zat chu Israel sipaite kutah an inpe tawh tih a sawi bawk.

Khan Yunis-ah IDF leh Shin Bet hotute inhmu

Israel Defence Force (IDF) chief-of-staff Lt.Gen. Herzi Halevi leh Israel security agency, Shin Bet hotu Ronen Bar-te chu Thawhṭanni zan khan Gaza Strip chhim lam khawpui, Khan Yunis-ah an inhmu a, IDF-te hma lak dan leh hmasawn dante an sawi dun.

Halevi chuan Gaza hmar lam, chhim leh underground lamah pawh hma an sawn zel tih sawiin, IDF leh Shin Bet combat force-te dang zo tu mah an awm lo tih a sawi.

IDF leh Shin Bet hotute meeting-ah hian IDF Southern Commander Maj Gen. Yaron Finkleman, Dvision 98 Commander leh IDF Commandos chief chuan ni riat chhunga Israel sipaite'n Gaza chhim lama beihpui an thlak dan report kimchang an pe bawk. Kar li liam ta chhungin Palestinian mi 500 chuang man an nih thu leh, heng mite hi Shin Bet leh IDF Intelligence Unit 504-te'n thu zawh fiah tura an lak thu an tarlang bawk a ni.