Pakistan police station beihnaah mi 23 thi

Pakistan hmar thlang lam, Khyber Pakhtunkhwa province-a police station chu nimin khan thihchilh bomb hmanga beih a ni a, mi 23 an thi a, hliam tuar 28 an awm.

Pakistan-a firfiak pawl ding thar, Tehreek-e-Jihad Pakistan chuan Dera Ismail Khan district police station-a bomb tipuaktu an nih thu hi an sawi. Bomb puak avang hian station-a room pathum a chim a, nimin tlai lam thleng khan ruang lak chhuah hna hi thawh a ni.

Firfiakte bomb phurtu motor chuan police station main gate suin, bomb hi a puak zui a, hemi hnu hian silaiin an kap zui bawk a ni. Police-te hian kap letin, firfiak pahnih an kap hlum tih an sawi.

Khyber Pakhtunkhwa province-ah hian kumin January thla khan Peshwar-a mosque chu thihchilh bomb hmanga beih ni tawh bawkin, he pawikhawihna thlengah hian mi 101 an thi a ni. Kumin chhungin an ramah hian firfiakte pawikhawihna a thleng ngun hle a, kum hmasa lam aiin pawikhawihna thleng hi 80% dawnin a tam tih Pakistan Institute for Conflict and Security Studies chuan a tarlang.