Khawvela Opium siam chhuaktu lian ber Myanmar

United Nations report tharah Myanmar chuan Afghanistan lehpelin, kum 2023 chhunga khawvela opium siam chhuaktu lian ber a ni tih tarlan a ni.

Nimina United Nations Office for Drugs and Crime (UNODC) tihchhuahah, Myanmar hian kuminah heroin siamna atana pawimawh, opium hi metric ton 1,080 vel a siam chhuak a ni. Hetih lai hian kum eng emaw zat opium siam chhuaktu lian ber ni ṭhin, Afghanistan-ah chuan nikum April thlaa Taliban-in poppy chin a khap tak avangin kumina opium an siam chhuah hi kum hmasa aiin 95% zetin a tlahniam.

UNODC chuan Myanmar 'opiate economy' hi USD tld 1 - USD tld 2.4 velah a pung chho a, hei hi kum 2022-a an ram GDP aṭanga 1.7 - 4.1% a tling pha a ti. Nikum khan Myanmar-ah opium hi metric ton 790 siam chhuah a ni.

Kum 2022 kum chanve hnu lam aṭangin loneitute zingah poppy ching an pung chho nasa a, hei vang hian kumina an thar zat pawh a pung nasa ta hle a ni. Kum 2022-23-a Myanmar-in opium a siam chhuah hi kum 20 chuang chhunga a tam ber ṭum tur niin UNODC chuan a chhut bawk.

Myanmar rama poppy chinna hmunpui ber chu an ram hmar lam, Shan state niin, tun hnaiah he bialah hian sipaite leh armed group hrang hrangte an inbei nasa hle. Shan state-ah hian an ram puma poppy area, hectare 41,300-a zau aṭanga 88% a awm. Kum 2022-a chawhruala hectare khata poppy kg 19.8 thar chhuah chu, 2023-ah kg 29.4-ah a pung tawh bawk a ni.