Israel-Hamas war : UN-in Gaza Strip-a inkahhai puang thuai turin phut

United Nations chuan Thawhlehni khan Israel leh Hamas-te chu inkahhai puang thuai tura phutna resolution a pass.

Thawhlehnia UN General Assembly meeting-ah hian Gaza Strip-a indona tuartute hnena chhawmdawlna pek an nih theihna atana inkahhai puang tura phutna hi member 193 zingah hmun lia ṭhena hmun thum aia tamin an thlawp a ni. Kar hmasa lam khan UN Security Council-a inkahhai puan phutna resolution siam chu US chuan a lo veto tawh a, mahse, General Assembly-ah hian veto power hi a nei lo a ni.

UN-a Palestinian palai, Riyad Manosur chuan khawvel hmun hrang hranga Palestinian thlawptute'n lungawi lohna an lantir fo chu US chuan a haider reng tawh tur a ni lo tiin, indona thleng mek titawp a, nunna chhanhim chu an zavaia hmalakna tur a ni tih a sawi.

Hamas nena an indo mek chungchanga Israel thlawp tlattu, US president Joe Biden pawhin UN General Assembly-a vote lak a nih hma, 2024 re-election campaign a neihnaah, Israel chuan Gaza Strip-a bomb a thlak chhunzawm reng avangin khawvel thlawpna a hloh zel niin a lo sawi lang tawh bawk.

General Assembly resolution hian Gaza Strip-a inkahhai puang thuai tura a phut bakah, Hamas firfiakte'n October 7-a Israel an beih ṭuma an mi man, tun thlenga an la hren mekte chu phut leh nei loa chhuah vek tura an phut thu an tarlang bawk.

Israel leh Hamas hian ni sarih chhung indo chawlh lailawk an lo nei tawh a, hemi chhung hian an mi mante an inthleng tawn a ni. Inremna hi siam leh tura nawr ni mah se, tun thlengin inremna an la siam leh thei lo. UN-a Israel ambassador, Gilad Erdan chuan inkahhai puan chu Hamas firfiakte thuam chakna tur mai a ni tiin, Israel leh Gaza-a cheng mi tam tak tana thihna thlentu tur a ni, a ti.