Thailand lal sawiselna thu post-tu Thailand MP man

Thailand hmeichhe MP, Rukchanok "Ice" Srinork chu an ram lal sawiselna thu post-ah puh a nih avangin man a ni a, kum ruk tang turin hrem a ni.

Thailand-ah hian lal chhungkua sawisel khapna dan khauh tak, lese-majeste law hman a ni a, he dan hnuaiah hian mi eng emaw zat hrem an lo ni tawh. Kumin inthlana hnehna changtu, Ice-i party, Move Forward Party chuan lese-majeste law siam ṭhat hi phut a, mahse, Senate chuan hemi vang hian Move Forward Party-in sorkar siam an tum pawh an dan phah thung.

Human Rights-a Thai lawyer-te chuan lal chhungkaw sawisel khapna dan hmang hian kum 2020 aṭang khan mi 260 vel hrem an ni tawh tih an sawi a, tun kar tir lam khan kum 26 mi pakhat chu lal chuanna motor-in a tlan pelh laia a lo au khum avangin jail-ah tantir a ni bawk.

Nimin khan Bangkok court chuan Ice hi Move Forward Party a zawm hmaa lal sawiselna thu pahnih a post avangin thiam loh a chantir a ni. Ice hian a thu post-ah an ramin Covid-19 hripui leng an tawrh chungchangah an lal hmalakna sawiselna leh, pakhatah chuan midangin lal an sawiselna an post a post chhawn leh a ni. Move Forward Party hruaitu zingah hian lese-majeste law hmanga thubuai siamsak pawh eng emaw zat an awm a, an zinga a tam zawk chu kum 2020-a nawrh huaihawtnaa telte an ni.