Russia-in missile hmangin Ukraine khawpui a kap

Russia chuan nimin zing lam khan Ukraine khawpui, Kyiv chu missile-in a kap a, building eng emaw zat a chhiat bakah, hliam tuar mi 45 vel an awm.

An ram huna zing lam dar 4 velah Kyiv khawpui hi beih niin, thil puak ring tak tak hriat tur a awm. Hei hi tun kar chhunga he khawpuiin beih a tawh ṭum hnihna a ni.

Kyiv mayor, Vitali Kitschko chuan khawpui khawchhak lam, Dniprovskyi district chu missile hian kah a ni tih sawiin, hliam tuar mi 45 zingah hian naupang pahnih an tel tih a sawi. Apartment building, private house leh car eng emaw zat an kang a, naupang hospital tukverh darthlalangte a kang bawk tih a sawi.

Thawhṭanni khan Russia chuan Kyiv khaw dai hi missile-in a lo kap tawh bawk a, chenna in tam tak chhiain, chhungkaw 100 vel chu electric supply nei loin an awm phah a ni.

Ukraine president Volodymyr Zelenskyy hi US-ah a zin mek a, Congress-ah Russia nena an indo meknaah an ram sipaite chhawmdawlna pek belh turin a ngen a ni. Indona thlen mek karah, Ukraine hian cyberattack pawh an tawk fo. Telecom provider, Kyivstar chuan Thawhlehni khan hacker-te'n an service an tihbuaisak thu an sawi. Kyivstar hian Ukraine-ah hian mobile customer maktaduai 24 chuang a nei a ni.