New Zealand-in hri kai thar awm vangin inthlan hun sawn

New Zealand ramah ni 102 chhung Covid-19 kai thar an nei tawh loh hnuah hri kai thar an awm leh tak avangin an ram Parliament inthlan, September 19-a neih tura tih chu October 17-ah sawn hlat a nih thu prime minister Jacinda Ardern chuan nimin khan a puang. 

Ruahman lawk dan chuan inthlanpui hi September 19-a neih tura tih a ni a, hemi atan hian party-te pawh an campaign tawh a ni. Mahse August 11 khan health official-te chuan an rama khawpui lian ber, Auckland khuaa chhungkaw khata mi hri kai thar pali hmuh belh a nih thu an tarlang a, hei vang hian kar liam ta khan Auckland-ah hri inkai chhawnna a awm loh nan ni 12 chhung atan lockdown (level three) puan nghal a ni. 

Ni 100 chuang zet hri kai an awm thar tawh loh hnua hri kai hmuh thar lehte hian khawi aṭangin an kai tih hrait Hri kai hmuh thar pali te hian khawi aṭangin nge hri hi an kai tak tih hriatchian a la ni thei lo. March thla aṭang khan ram dang mi tan an border-te khar vek niin, an ram mi hawte pawh ni 14 chhung inkhung hran tir zel an ni.  Official-te chuan hri kai hmuh tharte genome testing neihpui an nih hnuah an hri kai hi 'strain' thar niin an sawi.

Eptu pawl National party pawhin inthlan hun sawn hlat hi an thlawp a, kar liam taa hri kai thar hmuhchhuah a nih leh tak avang khan inthlanna neih tura campaign pawh tihtawp zui a ni bawk. Inthlan hi sawn hlat ni mah se New Zealand danah chuan November 21 aia tlai lohah inthlanna hi neih fel tur a ni. Inthlan hun sawn hlat a nih rual hian Parliament member term pawh September 6 thleng pawhsei a ni nghal bawk. 

New Zealand-a Covid-19 hri kai hmuhchhuah hmasak ber chu February 26 khan a ni a, May 1 aṭanga August 10 inkar khan an ram chhungah hri inkaidarhna thleng a awm lo. New Zealand-a hri kai hmuh chhuah tawh hi mi 1,631 an awm tawh a, heng zinga mi 22 chuan an thihpui a ni. Enkawl dam tawh hi mi 1,531 an awm a, hri kai mek hi rampawn aṭanga kai leh ram chhung aṭanga kai hi mi 78 an la awm a ni. 

Nimin thleng khan khawvel pumah Covid-19 kai hmuh chhuah tawh hi mi 2,18,49,825 an awm tawh. Hri kai zinga mi 1,45,74,418 chu an dam leh tawh a, mi 7,73,497 in an thihpui awh a ni. Hri kai mek zinga 99% chu taksa lama harsatna nei lian tham nei lo a ni a, mi 64,246 (1%) erawh an dinhmun a ṭha lo hle thung.