Sri Lanka parliament session Aug 20-ah nei dawn

Sri Lanka parliament pakuana session hmasa ber chu August 20 zing dar 9:30 hian neih tum a ni a, member of parliament (MP) zawng zawngte tel vek turin Parliament Secretary-General Dhammika Dasanayake chuan Pathianni khan a hriattir.

He session-ah hian president Gotabaya Rajapaksa chuan inthlan neih zawh taka sorkarna chelh tura thlan tlin, Sri Lanka Podujana Peramuna (SLPP)-in an term kum 5 chhunga an hmalakna (policy) tur khuh hawnna a sawi dawn a ni. Sri Lanka president hi parliament member ni lo mah se constitution chuan session-a a tel a phal thung a ni.

Parliament deputy Secretary-General Neil Iddawela chuan MP zinga kum 30 hnuai lam MP 5 an awm thu sawiin, kum 40 aṭanga 50 inkarah hian MP 60 lai an awm thu a sawi bawk. Sri Lanka parliament member  225 awmah hian MP thar hi mi 75 an awm a, hmeichhe MP hi 10 an awm bawk.

Sri Lanka parliament inthlan hi ṭum hnih lai Covid-19 hri leng vanga tihkhawtlai a nih hnuah August 5 khan inthlanna hi neih a ni a, August 7 khan result puan zui a ni. He inthlanah hian SLPP chuan hnehna an changin, seat 225 awmah seat 145 an la a ni.