Israel-Hamas war : Israel mipui tam zawkin Gaza aṭanga sipai lak chhuah thlawp lo

Israel leh Palestinian firfiak pawl, Hamas-te indona thleng mekah, United Nations General Assembly chuan inkahhai puang thuai tura phutna resolution a ti chhuak a, hetih lai hian Israel mipui tam zawk chuan Gaza Strip aṭanga an sipaite lak chhuah duh loin, Hamas nuai chimit tura beihpui an thlak chhunzawm zel an duh.

Thla hnih chuang Israel leh Hamas-te hi inbei tawhin, Israel lam pawhin an tuar nasa a, Thawhlehni khan Gaza-ah Israel sipaite ambush niin, sipai 10 an thih belh leh a, an zingah hian colonel pawh a tel. October 7 aṭanga Hamas nena an inbeihnaah hian Israel sipai 115 in nunna an chan tawh a ni. Gaza Strip-a Israel sipaite beihpui thlaknaah Palestinian mi 18,500 chuang an thi tawh bawk.

Indona avanga nunna chan leh chhiatna nasa tak a thleng chungin, Tel Aviv Univeristy-in Israel mipuite ngaihdan a lak thar berah chuan Gaza Strip aṭanga an sipaite lak chhuah chu a tam zawkin an duh lo a, Hamas firfiakte lakah beihpui thlak chhunzawm zel turin an duh. Hamas an beihna an thlahdul chuan, Israel hmelmate chuan an chak lohnaah ngaiin, Israel tan a pawi thei zawk dawn niin an ngai.

Israel parliament, Knesset-a foreign affairs and defence committee chair, Yuli Elestein pawhin indona an hmachhawn mek chu hautak hle mah se, sipaiten an tum ber chu Gaza-a Hamas-te infrastructure tihchhiatsak vek a nih thu a sawi.

Hetih lai hian Hamas chuan Thawhlehnia Gaza-a Israel sipai 10 te thihna thleng chuan, Israel-in Gaza Strip-a a thil tum chu a hlawhtling dawn lo tih a tilang chiang hle a ni, a ti. Israel sipaite chu Gaza rama an cham rei leh an tuar nasa dawn tihna a ni, tiin an vau zui bawk.

Hamas-te beihna chhunzawm zel dawn : Israel Minister

Israel-in Gaza Strip-a beihpui a thlak mek titawp tur leh, inkahhai puang tura ram hrang hrangte an nawr mekna karah, Israel foreign minister Eli Cohen chuan, "International support tel emaw, tel lo emaw pawh ni se Israel chuan Hamas-te a beihna a chhunzawm zel dawn," tiin a sawi.

UN General Assembly-ah Gaza Strip-a inkahhai puang turna nawrna resolution chu UN member tam zawkin an thlawp a, Israel ṭhianṭha leh a lamṭang tlat ṭhin, US chuan he resolution hi thlawp lo mah se, Gaza Strip-a Israel sipaiten beihpui an thlak chhunzawm reng vangin khawvel thlawpna pawh an hloh ṭan mek niin US president Joe Biden chuan a lo sawi ve tawh bawk.

US President aṭanga sawiselna an tawh hnuah, Israel Minister chuan an hmalakna chu tawpsan mai chi a ni lo tih a sawi zui a, "Tuna kan dinhmun aṭang chuan inkahhai puan chu firfiak pawl Hamas tana thilpek lawmawm tak a ni dawn a, Israel mipuite an rawn rikrap chhunzawm leh nghal dawn tihna a ni," a ti.