South Korea-a kohhran member-ah hri darh thar leh

South Korea-ah Pathianni khan hri kai hmuh thar mi 279 an awm leh a, March thla hnu lama ni khata hri kai  hmuh thar mi 200 an tlin ṭum khatna a ni. 

Hri kai hmuh tharte nen an rama Covid-19 kai hmuh chhuah tawh hi 15,318 an ni tawh a ni. Seoul metropolitan sorkar chuan Pathiannia hri kai hmuh chhuah zinga 193 chu Sarang Jeil Church member-te an nih thu sawi. He kohhranah hian member 4,066 awmin, health official-te chuan an vai hian test an ni dawn tih an sawi. Hri kai hmuh belh zat pawh a pun chhoh a rinawm thu an sawi bawk. 

President Moon jae-in chuan a hmaa Shincheonji Church aṭanga hri a darh hnuah tun ṭum hi hri darh leh hlauhthawnawmna a nih thu a sawi. Tun thla tir lam khan Shincheonji Church chu man a lo ni tawh a, an kohhran member kalkhawm chungchangte zepah puh a ni. 

Pathiannia hri kai eng emaw zat hmuhna, Sarang Jeil church hi Seoul-a awm niin an hruaitu chu Rev Jun Kwang-hoon a ni. Kum 63 mi Rev Jun hian sorkar kalphung pawh a lo sawisel fo tawh a, Seoul-ah sorkar duh lohna kawngzawhte pawh a lo huaihawt tawh ṭhin. 

Sorkarin hri darh tur venna atana kohhran memberte inkhung hrang a, in test vek tura a tih chu duh loin Inrinni liam ta khan rally a huaihawt leh a ni. President Moon chuan Rev Jun rally huaihawtnaa telte chu mdiangte nunna dinhmun derthawnga daha puhin a dem thu a sawi. 

Seoul city governmenet chuan hri darh tur venna atana sorkarin khuahkhrihna a siamte a zawm loh avangin Rev Jun lakah action an lak tur thu an tarlang bawk.