Israel-Hamas war : US-in Gaza-a beihpui thlak tinep turin Israel a nawr

US chuan Israel hnenah Gaza Strip-a Hamas firfiakte laka beihpui a thlak mek chu tinep tawh turin a ngen a, civil mite thihna thlen tlem thei anga bera hma la turin a ngen bawk.

US president Joe Biden chuan, 'Civil mite himna tur chu ngaihtuah uluk zual turin ka duh a ni. hemi rual hian Hamas ho an beihna titawp turin kan nawr lo a, mahse fimkhur zual se kan duh a ni," tiin Israel-in a ram himna tura a beihna an thlawp chhunzawm zel tih a sawi zui bawk.

Israel-in Gaza Strip-a Hamas laka beihpui a thlak mek chu titawp turin ram hrang hrangten an nawr a, United Nations General Assembly-ah pawh Gaza-a inkahhai puang thuai tura phutna resolution pawh an lo pass tawh a ni. Hamas nena an indo ṭantirh aṭanga Israel thlawp tlattu, President Biden pawhin Israel hi na taka a che chhunzawm zel a nih chuan firfiakte a beihna kawnga ram dangte thlawpna a hmuh pawh a hloh chhoh zel a hlauhthawnawm thu a lo sawi tawh a ni. Hetichung hian US chuan Israel a thlawpna erawh a la chhunzawm zel a, UN General Assembly resolution siama vote lakah pawh a thlawp lo lamah a vote a ni.

US national security adviser Jake Sullivan chu Ningani khan Israel-ah zinin,Israel prime minister Benjamin Netanyahu leh war cabinet member-te a kawm. Sullivan leh Netanyahu-te hian Hamas laka beihpui thlaknaa civil mite tawrhna thlen tlem thei ang tura kalpui dan turte an sawidun niin White House chuan a tarlang.

White House thupuangtu, John Kirby chuan US-in indona chu tawp thuai tawh se a duh tih a sawi a, buaina tihtawpna tur chu Hamas kutah a innghat lian hle a ni, a ti zui bawk. 'An duh chuan an mi hrente chhuahin, an mi leh sate chu an ralthuamte dah thla tura hriattirin he indona hi an titawp thei reng a ni," a ti.