CanSino siam Covid-19 vaccine China-in pawm

China-a vaccine siam chhuaktu CanSino Biologics Inc Covid-19 vaccine siam, Ad5-nCOV chu sorkarin a pawmsak (patent approval) tih China media People’s Daily chuan a tarlang.

CanSino Biologics Inc-te hian kumin March 18 khan patent approval hmu turin sorkarah dilna an thehlut a, kar liam ta August 11 khan sorkar chuan an dilna hi a pawm zuisak ta a ni. China sorkarin CanSino Biologics Inc siam Covid-19 vaccine hi patent approval a pek hmasak ber a ni. He vaccine hi large-scale testing neihpui la ni lo mah se, China sipaite tan chuan hman phalsak an ni tawh nia sawi a ni bawk. 

Kar liam ta August 11 vek khan Russia president Vladimir Putin chuan Covid-19 vaccine hmasa ber tur, 'Sputnik V' chu sorkarin a pawm thu a lo sawi tawh a, Russia sorkarin vaccine a pawm ni khan China-in an rama Covid-19 siam chu a lo pawm ve bawk tih nimin khan People’s Daily kal­tlanga hriat a ni zui ta a ni. 

Saudi Arabia pawhin tun thla chhungin an ram­ah CanSino siam Covid-19 vaccine chu clini­cal trial phase 3 kal­pui hman an tum thu a tarlang a, volunteer mi 5,00-ah enchhin a ni dawn tih a sawi. CanSino hian  Brazil leh Chile ramte an ramah an vaccine siam hi  Phase 3 trial neih a nih theihna turin inbiakna an neihpui mek tih a sawi bawk.