Hong Kong-in activist 5-te awmna hrilh thei tan lawmman siam

Hong Kong police-te chan democracy activist, ram danga tlanchhe mek mi panga man an nih theihna atana an awmna chin hrilh thei tan lawmman, an ram pawisa Hong Kong dollar maktduai 1 pek an tiam.

Police-ten man tuma an zawn mekte hi Simon Cheng, Frances Hui, Joey Siu, Johny Fok leh Tony Choi-te an ni a, an panga hian National Security Law bawhchhiaah puh an ni. Heng activist-te khawsak mekna, US leh UK chuan Hong Kong sorkar thiltih hi an dem thu an sawi. Hetih lai hian Hong Kong National Security Department chief superintendent Li Kwai-wah chuan press conference a neihah, activist panga-te hian an ram an hralh a, Hong Kong mipuite hmakhua an ngaihtuah lo nia puhin, National Security Department chuan a tawp thlengin a umzui zel dawn tih a sawi. Activist-te hi ram danga an tlanchhiat hnuah pawh, ram pawn lam aṭangin Hong Kong himna tiderthawng zawngin chet a la chhunzawm zel a ni, a ti bawk.

July thla khan Hong Kong police-te hian activist dang pariatte awmna chin hrilh thei hnenah lawmman pek a lo tiam tawh bawk a, anmahni thlawptu eng emaw zat chu man ni tawh mah se, heng activist pariatte hi tun thlengin man an la nei lo. Wanted list an tihchhuah hmasak zingah hian Hong Kong lawmaker naupang ber, pro-democracy Umbrella Protest thlawptu Nathan Law pawh a tel.

National Security Law hnuaiah hian Hong Kong police-te chuan mi 300 dawn an lo man tawh a, foreign ramte thawhpuia an puh Hong Kong media mogul Jimmy Lai pawh an man zingah hian a tel a ni. Kum 76 mi, Lai hi thiam loh chantir a nih chuan dam chhung tang tura hrem theih a ni ang.