Israel leh UAE-in direct phone link hawng

Israel leh United Arab Emirates (UAE) chuan August 13-a thawhdunna tur inremna an siam hnuah an hmalakna hmasa atan ram pahnihte inkara direct telephone service chu Pathianni khan an hawng ta. 

UAE hi Gulf Arab ram zinga Israel nen inpalai tawnna tura inremna siampui hmasa ber a ni a, Middle East-a Israel-Arab peace treaty siam pathumna a ni bawk. Inremna hi September thla tir lamah Washington-ah an ziahfel hman beisei a ni. 

Direct telephone service hawn a nih velah hian Israel foreign minister Gabi Ashkenazi leh UAE foreign minister Abdullah bin Zayed al-Nahyan te inbiain, duhsakna te an inhlan tawn a ni. UAE-a telecom provider-te chuan Israel country code +972 an block-na te pawh an titawp nghal vek tih Israel communication ministry chuan a tarlang. Ram pahnihte hian Covid-19 research neih kawnga thawhdunna tur  inremna an ziak tawh bawk a ni. 

Israel leh UAE-in thawhdunna tur inremna an siam thei ta hi US President Donald Trump hmalakna rah chhuah a nih thu a chief adviser Jared Kushner chuan a sawi. Kushner chuan Trump hian US President a nih tirh aṭang khan Israel leh UAE-te inremna an siam theihna atan hian hma a la nghal tih a sawi a, hei vang hian ram pahnihte tan mai ni lo, Middle East bial tana chhinchhiah tlak, inremna hi an siam thei ta a ni, a ti. 

Israel hian kum 1948-a Independence a hmuh hnu khan Arab ram pahnihte chauh inremna a la ziahpui. Kum 1979-ah Egypt leh kum 1994-ah Jordan ram inremna a siampui. Kum 1999 khan north-west Africa-a Arab League member, Mauritania nen palai an intir tawn leh a, mahse kum 2010-ah an inlaichinna hi a tawp zui leh a ni. President Trump chuan Arab leh Muslim ram tam zawkte chuan Israel hi thawhpui a, inremna an la siampui zel a beisei thu a sawi. 

Ram pahnihte hian an inlaichinna siamṭha a, palai an intirh tawn an remti. Hemi atan hian embassy-te pawh an hawng dawn a ni. Tourism, education, healthcare, trade, security leh area hrang hrangah an thawkdun tawh dawn a ni. 

Israel chuan inremna an siamna hnuaiah Palestine ram a luah, West Bank-a ram zauh a tumna chu hun eng emaw chen chawlh rih a tum thu a sawi a, hemi rual hian an ruahmanna lo siam tawhte chu thlak danglam a ni lo tih a sawi nghal bawk. UAE pawhin Palestinian mipuite a thlawp zel tur thu leh, Israel leh Palestinian ram dinna tur, two-state solution chu a thlawp zel dawn tih a sawi bawk. 

Inremna siam hnuaia ram pahnih aiawhte hian area hrang hranga thawhdunna tur thuthlung pawh an ziah chhoh thuai rin a ni. Inrinni liam ta khan UAE-a Emirati APEX National Investment company leh Israel-a Tera Group-te chaun Covid-19  research neihna tura atana thawhdunna tur chu Abu Dhabi-ah an ziak nghal. 

US President Donald Trump hmalakna hnuaia ram pahnihte inremna siam hi ram hrang hrangten lawmawm an tih thu an sawi laiin Palestinian,  Iran leh Turkey ramte chuan an sawisel thung. 

UK prime minister Boris Johnson chuan Middle East-a remna leh muanna a awm theihna tura hmalakna pawimawh tak a nih ngei a beisei thu a sawi. Egypt president Abdul Fattah al-Sisi pawhin lawmawm a tih thu a sawi a, Jordan foreign minister Ayman Safadi chuan ram pahnihte inremna siam hian remna a awm theihna tura inbiakna, chhunzawm theih loha awm mek chu a siamṭhat ngei a beisei thu a sawi bawk. 

Hetih lai hian Palestinian lam chuan an sawisel nasa hle thung. Palestinian official Hanan Ashrawi chuan UAE in a ruka a thil kalpui chu a rawn lang chhuak ta a ni tiin, Palestinian president Mahmoud Abbas chuan phatsanna tiin a sawi.  Iran foreign ministry pawhin inremna siam chu thil zahthlak tak a nih thu a sawi. Gaza Strip-a rorellai, Hamas-te chuan he inremna siam hi Palestinian mite hnung lam aṭanga beihna ang hiala an ngaih thu an sawi bawk.