Tihpalh thila Hamas mi hren kah hlum an nih dan chhui chiang dawn

Israel Defence Force (IDF) chuan Zirtawpni liam ta khan Gaza Strip-a Hamas nena an inbeihnaah, Hamas-te'n Israel mi an hren zinga mi pathum chu tihpalh thilin an kap hlum. He thil thleng hi Israel chuan an chhui chiang dawn tih an sawi tawh bawk.

Prime minister Benjamin Netanyahu chuan he thil thleng hi pawi a ti takzet tih a lo sawi tawh a, mahse, hemi rual hian hei hian Hamas laka beihpui an thlak mekna erawh a tihbahlah phah dawn lo tih a sawi.

Israel sipaite pawhin Shejaya beihpui an thlaknaah Hamas mi hren, Israel mi pathumte kah hlum tel an nih chu an tihsual liau liau a nih thu an sawi. Senior army officer chuan Hamas khawsakna, Shejaya-a building pakhat aṭanga heng mi pathumte chhuak hi hmuh an ni tih sawiin, an pathum hian kawr an ha lo a, an zinga pakhat chuan tiangah flag var an siam chawp a keng a ni, a ti. Mahse Hamas ho thang kam a nih ringin, sipai chuan 'firfiak' tia auin a lo kap a, an zinga pahnih chu a hmunah thi nghalin, pakhat chu hliam chungin building-ah a tlan lut a ni. A hnuah rawn chhuak lehin, silai hmet puak tawh lo tura thupek awm mah se, sipai pakhat chuan a lo kap leh niin officer chuan a sawi. Heng mi pathumte hi kah hlum an nih hnuah, October 7-a Hamas firfiakte'n Israel an beih ṭum Israel mi an mante zinga mi an ni tih hriat an ni ta a ni. Sipaite hriatsual vanga an kah hlum takte hi Yotam Haim, 28, Samer Talalka, 22, leh Alon Shamriz, 26 te an ni.

IDF chief of staff Herzi Halevi chuan Hamas mi man pathumte kah hlum an nih chungchangah, IDF leh commander-te chuan mawhphurna pumhlum an la tih a sawi a, heng mi pathumte hian an theih angin tute nge an ni tih pawh sipaite hnenah hriattir hi an tum a ni, a ti. 'Flag var vai chu kan kap tur a ni lo. Mahse he thil thlenna hmun hi firfiakte nena kan inbeih nasatna hmun a lo ni si a ni," a ti. Israel mi pathumte thihna thleng chu pawi a tiin hrehawm a ti tak zet tih a sawi a, IDF hian Hamas mi hrente nung dama chhanchhuah tluka duh an nei lo, mahse, he thilah hian kan hlawhchham a ni, a ti. Hemi rual hian hetiang vanduaina hi a thlen nawn tawh lohna turin Israel sipaite chuan theihtawp an chhuah tawh dawn tih a sawi.

Hamas dintu zinga mi fapain Israel thlawp

Hamas dintu zinga mi, Sheikh Hassan Yousef fapa, Mosab Hassan Yousef chuan TV interview a neihah, October 7-a Israel an beih chungchangah Hamas-te na takin a dem.

Mosab Yousef chuan Gaza Strip-a cheng mipuite chuan an bial chhung himna leh, remna leh muanna a awm theihna turin Hamas-te chu an dodal a ngai a ni, a ti. Kawng hrang hrangah Israel beihnaa inhnamhnawiha Hamas firfiakte chu vauin, Israel sipaite chauh ni loin, amah ngei pawhin a um zui dawn a, an pawl hi nuai chimih a ni dawn tih a sawi bawk.

Kum 2007 thleng khan Mosab Hassan Yousef hi Israel undercover agent angin a thawk a, a hnuah US-ah a pem a ni. Hamas-ho tharum thawhna thlen ṭhin tihtawp a duh thu a sawi avangin Hamas-te nghaisak leh tihduhdah a tawk nasa hle tih a sawi a, phatsantuah an puh bawk niin a sawi.