Israel-Hamas war : Jabalia-a Israel beihpui thlaknaah mi 90 an thi
Gaza Strip hmarlam, Jabalia refugee camp-a Israel sipaite beihpui thlaknaah Palestinian mi 90 vel an thi niin Hamas health official-te chuan an sawi a, mahse hemi chungchangah hian Israel lam chuan sawi engmah an la nei lo thung.
Pathiannia Israel sipaite beihpui thlaknaah hian mi 100 chuang an hliam nia sawi a ni bawk. Thi zingah hian Palestinian Islamic Jihad group thupuangtu, Dawoud Shehab-a fapa pawh a tel a ni.
Israel sipaite hian Hamas-ten October 7-a an ram bei a, mi tam tak an thah leh man avanga phuba a laknaah, Gaza Strip-ah hian beihpui a thlak chhunzawm zel. Ram leh pawl hrang hrangten inkahhai puang tura an nawr reng karah, Israel chuan Hamas firfiakte nuai chimit vek tura an hmalakna chu kalpui zel an tum thu an sawi. Hamas-te hmun leh tawmrukna hrang hrangte an bitum zel dawn tih sawiin, Jabalia refugee camp chhehvela chengte pawh hi an indo ṭantirh lam aṭangin hmun danga insaseng turin a lo hriattir fo tawh bawk.
Lebanon-ah Hamas-in member thar la
Hamas pawl chuan December 4 aṭang khan Lebanon-ah an pawl mi leh sa lakna tur an puang a, hei hi Lebanon rama political party leh official hrang hrangten an sawisel nasa hle.
Lebanon official-te chuan Palestinian firfiak pawl, Hamas chu an ram inrelbawlna leh thuneihna bawhchhiaah puhin, an thiltih chu an dem thu an sawi. Hamas hian refugee camp leh mosque-ahte member an lak thar tur hi puangin, hemi kaltlang hian mi thar hi an lalut a ni.
October 7-a Hamas-ten Israel chhim lam an beih avanga Israel leh Hamas-te indona a thlen hnuah, Lebanon-a Hezbollah firfiak pawl pawhin missile hmangin Israel hi an lo bei ve bawk. Israel sipaite pawhin bei lêtin, an inbeihna avang hian Lebanon-ah mi 100 chuang an thi tawh a, an zinga a tam ber hi Hezbollah mi leh sa an ni.
Rafah-ah mipuite'n chhawmdawlna phurtu rawk
Hun rei tak indona an tawrh tawh avangin Gaza Strip-a cheng mipuiten ei in leh mamawh dang tam tak an tlachham tawh a, Egypt ramri kaltlangin chhawmdawlnate phurh luh ni mah se, an mamawh a la phuhru zo lo hle.
Pathianni khan Gaza chhim lama Rafah-ah mipui rilṭam leh mangangte chuan chhawmdawlna phurtu truck-te chu beiin, ei tur leh mamawh dang an phurhte an ru chhuak. Mipui pungkhawmte hian Egypt aṭanga rawn lut motor-te hi lo hualin, an din luih tir a, hemi hnu hian an thil phurhte hi lak thlak sakin, mipuite hian an insem zui a ni.
United Nations chuan Gaza mipuite hian ei tur an mamawh takzet tawh tih sawiin, tun anga harsatna lian hi an la tâwk ngai lo niin tun hnaiah Gaza Srip tlawhtu, UNRWA hotu Phillipe Lazzarini chuan a sawi. UN World Food Programme (WFP) chuan Gaza-a cheng zinga a zahve dawn chuan khawi aṭangin nge eitur an hmuh dawn tih pawh an ngaihtuah thiam tawh lo niin a sawi a, chhawmdawlna phurtu truck-te chu ramriah enfiah zel an nih bawk avangin an lut chak lo hle tih a sawi.
Rafah-ah hian square kilometre khatah mi 12,000 chuang khawsa zel ang an ni a, October thla tir lam aṭanga Israel sipaiten beihpui an thlak avanga tlanchhia zinga 85% chu Rafah-ah hian a tlan lut nia sawi a ni.