NKorea-in ICBM kap chhuak

North Korea chuan nimin zingah khan intercontinental ballistic missile a kap chhuak. ICBM hi US ram khawi hmun pawh kap pha tura ngaih a ni.

NKorea hian kar liam taa South Korea leh US Defence official-te meeting neih chu sawiselin, indona kalpui tumah a puh a, hemi hnu lawk hian ICBM hi a kap chhuak zui ta a ni. Nimina a missile kah chhuah hi minute 73 vel thlawkin, km 1,000 vela thui a thlawk hman niin South Korea leh Japan official-te chuan an sawi. Hei hi kumin chhunga NKorea-in ICBM a kah chhuah ṭum ngana a ni bawk. South Korea national security advisor, Kim Tae-ho chuan nimina ICBM kah chhuah hi solid-fuel missile a nih thu a sawi. Pathianni zan khan short-range ballistic missile an kap chhuak bawk a, km 570 vel a thlawh hnuah tuipuiah a tla a ni.

Nimina ICBM kah chhuah hnu lawkah hian NKorea leh China ram aiawhte chuan Beijing-ah meeting an nei a, ram pahnihte thawhdunna tih ngheh dan turte an sawi.

China hi UN Security Council-a permanent member a ni a, kum 2017 thleng khan NKorea-in ralthuam a siam avanga an ram hrekna tur resolution siamte chu a thlawp zel ṭhin. Mahse 2017 hnu lamah hian hrekna siam hian engmah siamṭha loin, boruak a ti chhe zawk nia sawiin NKorea laka resolution siamte hi a thlawp tawh ngai lo thung.